SHILLONG, Risaw 13: U Myntri ka tnad ïalehkai jong ka sorkar jylla u Bah Wailadmiki Shylla ha ka sngi Nyngkong u la pynbna ba ka nongbah Shillong kan sa ïoh ban pdiang bad pynlong ïa ka Tri-Nation Women’s Football Tournament, ka ban kynthup ïa ka India, Iran, bad ka Nepal.
Kane ka lympung kaba la pynlong All India Football Federation, kan sa ïohi ïa lai tylli ki jingïakhun hapdeng ka 21 haduh 27 tarik mynta u bnai Risaw, ki ban sa long ha Jawaharlal Nehru Stadium, Polo, Shillong. Baroh lai tylli kin sdang ha ka por 6 baje janmiet.
Kane ka lympung kan kynthup ïa ka jingïakhun jong ka India pyrshah ïa ka Iran ha ka 21 tarik Risaw, nangta ka Iran pyrshah ïa ka Nepal ha ka 24 tarik Risaw bad ka India pyrshah ïa ka Nepal ha ka 27 tarik Risaw.
U Bah Wailadmiki u la pyntip ruh ba ka kynhun ïalehkai phutbol ki kynthei jong ka ri India kin sa wan ïuhkjat ha nongbah Shillong ha ka 17 tarik Risaw, ka Iran kan wan ha ka 19 tarik Risaw bad ka Nepal ha ka 22 tarik Risaw.
Kane ka lympung ïalehkai bar ri ba ka jylla kan sa ïohpdiang ka long hadien ba ka la lah ban pynlong ïa ka jingïalehkai ïaknieh rung sha ka AFC Asian Cup hapdeng ka India bad ka Bangladesh ha u bnai Lber, kaba la bud hadien ka jingïalehkai paralok hapdeng ka India bad ka Maldives. Naduh katei ka por, ka madan JN ka la ïoh ruh ban pynlong ïa ki katto katne ki jingïalehkai jong ka 134th Durand Cup 2025.
Da kaba bishar ïa ka jinglah jong ka jylla ban pdiang bad pynlong ïa kum kine ki lympung ha ki por ba ladep u Bah Wailadmiki u la pynpaw ïa ka jingsngew skhem ba ‘ka jingpynlong ïa ka Tri-Nation Women’s Football Tournament ruh kan long kaba jop’.
Ka jingphai khmat jong ka All India Football Federation sha Meghalaya ban pynlong ïa kine ki lympung ïalehkai jong ki ri ka pyrthei ka dei hadien ba ka iohi ba ki paidbah ka Meghalaya ki dei kiba ieid ïa ka phutbol nalor ba ka don ruh ïa ki bor pynïaid bad ki jaka ïalehkai kiba la biang ban pynlong ïa kum kitei ki lympung ïalehkai kiba heh.
Ha ka shithi ba la phah da u Deputy Secretary ka All India Football Federation (AIFF), u M Satyanarayan sha u President ka Meghalaya Football Association, Shillong Bah Hamletson Dohling u la pan ka jingïatrei lang bad ka ryngkat ryngkat bad ka AIFF lem ka tnad Sports jong ka Jylla ban pynlong ïa katei ka lympung ïalehkai kaba shongkun bad kaba ïaid beit ïaid ryntih.
Utei u heh ka AIFF u la ïaroh ruh ïa ka jingtbit jong ka Meghalaya ban pynlong da ka jingjop ïa ki jingïakhun paralok hapdeng ka India bad Maldives bad kumjuh ïa ka jingïakhun knieh rung sha ka AFC Asian hapdeng ka India pyrshah ïa ka Bangladesh.
“Ngi kyrmen skhem ba ka jingpynlong ïa kane ka Women’s Tri Nation Friendlies kan long biang kaba jop bad kaba seisoh da ka jingïatrei lang jong phi ryngkat baroh kiba don bynta lang ha ka jingpynkhreh,” u la ong.
Nangta u la ong ruh ba ka jingpynbiang naduh ka jaka sah, ka jingpynbit pynbiang ïa ka stadium, ka jingpynap lypa ïa ki lad ai jingsumar, bad baroh ki nongpynkhreh ïa kane ka lympung kan dei ka bynta kaba khraw ba ka Jylla kan lah ban pynlong biang ïa kane ka lympung ïalehkai kaba ïaid beit.
