Shillong, Risaw 13: Ka Shillong Lajong ka la sah sa tang shi kam ka jingjop ba kan ïada bad rah biang ïa ka nam lahduh jong ka Shillong Premier League hadien ba ka jingjop kaba shyrkhei pyrshah ïa ka Nongrim Hills da 5-0 kol ha ka jingïalehkai kaba la long ha ka janmiet jong ka sngi Nyngkong, ha madan First Ground-SSA Stadium, Polo.
U Wilbert Marbaniang (7’), u Deibormame Tongper (45’+3), u Ricky Kharkongor (57’, 68’) bad u Banlamkupar Rynjah (60’) baroh ki la pynkhihjar na ka bynta ka Lajong ban khur ïa ka jingjop kaba suk pyrshah ïa ka kynhun kaba don shatrai duh jong ka SPL 2025.
Ka jingjop ka la kyntiew ïa ka Lajong sha ka 18 poiñ hadien 8 tylli ki jingïalehkai, bad tam 1 poiñ ïa ka Langsning. Katba ka Nongrim Hills ka dang ïaineh ha trai duh jong ka miej da tang 1 poiñ naki 8 tylli ki jingïalehkai.
U Wilbert u la thep da ka khlieh na ka bynta ka kol kaba nyngkong ha kaba sdang hynrei ka SLFC ka la duh noh ïa ki katto katne ki kabu kiba thikna ban pynjlan ïa ka kol lamkhmat. Na ka liang jong ka Nongrim Hills, ka la ïoh tang khyndiat eh ki kabu ba thikna, ba kynthup ïa ka jingpyrshang kaba najngai jong u Bameaijingmut Majaw.
Ka Nongrim Hills ka la jan ïoh ban pynkhihjar hadien ba u nongapkol ka Lajong u Wanteilang Malngiang u khlem shym la lah ban bat skhem ïa ka bol kaba la wan na ka korner kick hynrei uwei pat u rangïalehkai dien ka Lajong u la lah ban pynkiar noh sharud ïa ka bol na ka bynta ka korner.
Katba dang ïaid ka jingïakhun u nongapkol ka Nongrim Hills, u Kitboklang Marbaniang u la trei shitom ban khanglad ïa u Ricky, hynrei tang shuwa ban kut ka kylla step, ka Lajong ka la ïoh ban pynjlan ïa ka kol lamkhmat da 2-0 lyngba u Deibormame.
Ka Lajong ka la pynthikna ba ka Nongrim Hills kan nym don lad shuh ban wanphai da kaba thep sa lai tylli ki kol ha ka kylla miet, ha kaba ar tylli na kine ki kol la thep da u Ricky, katba ïa kawei pat la thep da u Banlamkupar.
Ka jingïalehkai ha kane ka sngi kan long hapdeng ka Malki pyrshah ïa ka Langsning ha ka por 4 shiteng janmiet. Kane kan dei ka jingïalehkai kaba khatduh na ka bynta ka Langsning ha kane ka samoi ïalehkai jong ka SPL, katba ka Malki kan dang don sa kawei ka jingïakhun ban pyndep.
