Dawa ka SWSEJHD ïa ka Sorkar ban pynbiang ïa ki jaka ai jingsumar ha East Jaiñtia Hills

Khliehriat, Risaw, 12: Ka Synjuk ki Waheh Shnong East Jaiñtia Hills District ha ka sngi Saitjaiñ ka la aiti da ka dorkhas ha u Myntri ka tnat ka Koit ka Khiah Bah Wailadmiki Shylla da kaba kyntu ban un phaikhmat lem sha ki shlem ai jingsumar kiba don ha East Jaiñtia Hills District ban pynbit pynbiang ïa ki jingdomkam ha ki jaka ai jingsumar.
Katkum ka dorkhas ba la soi da u Secretary Synjuk ki Waheh Shnong East Jaiñtia Hills District Bah Jesper Bareh bad u Joint Secretary Bah Leningstar Rymbai ki la kdew ïa ki katto katne ki jaka ai jingsumar kum ka Khliehriat Civil Hospital, kaba donkam ban don ïa ki doctor specialist kum ki Obstetrician, Gynecologist, Anesthesiologist, Surgeons, Psychiatrist, Orthopedic, ENT Specialist bad Ophthalmologist.
Kum ka Sutnga Pubic Health Centre pat ban maramot pynbha ïa ki jaka shong jaka sah jong ki nongtrei bad kiwei kiwei ki jingdonkam ha katei ka jaka ai jingsumar.
Na ka bynta kiwei kiwei ki PHC bad ki Sub-Centre kiba don ha East Jaiñtia Hills District pat la kyntu ban pynbit pynbiang ïa ka um bam um dih, ka bor ding electrict khamtam ka Sub Centre ha shnong Maullian kaba donkam eh ïa ka machine transforme ka PHC ha Saipung pat ka donkam ban don ka surok kaba bha.
Ka Synjuk ka la kyrpad ïa u Bah Shylla ba un shimkhia halor kitei ki mat ba la kdew ba ki kam kin ïaid beit ïaid ryntih ha ki jaka ai jingsumar kiba don hapoh ka district, ban long ruh na ka bynta ka jingbit jingbiang ki paidbah nongshong shnong bad na ka bynta ki nongtrei jong ka tnat ka koit ka khiah.