Ka long kaba kongsan ban pynneh ïa ka kolshor tynrai kaba pynïasoh bad ka mariang: F R Kharkongor

Shillong, Risaw 12: Ka 3rd State Level Inter-School Traditional Singing Competition kaba ïadei bad ka kolshor ka la kut da ka jingiphuh iphieng ha kaba la pyninam ïa ka jingriewspah ka kolshor jong ka jylla Meghalaya ha ki rukom bapher bapher.
Ha kane ka jingïakob rwai tynrai ba la pynlong ha Lariti Performing Centre, ïa ka nam lahduh na ka liang ka kynhun la ïoh da ka Synod School katba ka Meghalaya Public School ka la long ka lahduh ha ka jingïakob rwai shimet.
Katkum ka kyrwoh la ong ba ïa kane ka jingïakob la pynlong da ka Tnad Arts & Culture ryngkat ka jingïatreilang bad ka Shillong Public School bad ha kane ka prokram la ïohi ïa ka jingïashimbynta shitrhem jong ki khynnah na ki skul bapher bapher kiba don ha ka jylla.
Shuh shuh nalor ka rwai ki khynnah ki la phong ruh ïa ka dur kaba itynnad lyngba ka riam tynrai ka jong ki bad ki la pynsngewtynnad ïa ki nongpeitkai lyngba ki jingsawa kiba mih na ki jingtem tynrai jong ki riewlum.
Ha kane ka sngi haba kren kum u Kongsan u Principal Secretary u Bah FR Kharkongor ula banjur ïa ka jingkongsan ban pynneh pynsah ïa ka kolshor tynrai bad ban pynïasoh bad ka mariang.
Na ka liang jong u, u la pynthikna ban bteng ïa ka jingai jingkyrshan ban pynlong ïa kum kine ki prokram, kiba thmu ban kyntiew ïa ka jinglong tynrai bad jinglong kyrpang ka kolshor.
Katba na ka liang ka Kong Silbi Passah kaba la ïoh ïa ka khusnam Padma Shri, ka la pynkynmaw ïa ki khynnah bad ïa ki nongpeitkai shaphang ka jingriewspah bad ïa ka kolshor kaba naduh hyndai hynthai bad ka la pynbyrngia ïa ki baroh lyngba ki jingrwai bad ki phawer tynrai nalor kiwei kiwei pat ki prokram.