Shillong, Oct 12: Ka Mylliem ka la ïoh ban khur ïa ka jingjop kaba kordor da 1-0 kol pyrshah ïa ka Nangkiew Irat ha kawei na ki jingïakhun jong ka lympung Shillong Premier League 2025 ha madan ïalehkai First Ground-SSA Stadium, Polo, ha ka janmiet jong ka sngi Saitjaiñ.
Kane ka shi kol kadei kaba la thep da u Alem Khongwir ha ka minit kaba 20 jong ka kylla step.
Ka jingjop ka la long ka jingkyrmen ïa ka Mylliem, ha kaba mynta ka la ïoh 11 poiñ, bad ka la kiew na ka tduh jong ka thup kyrdan ba don jingma sha ka kyrdan kaba san ha ka miej, hynrei ka dang donkam ban peit bñiah ïa kaei kaba jia ïa kiwei pat ki kynhun ha ki jingïalehkai kiba dang sah. Ha kawei pat ka liang, ka Nangkiew Irat hadien ba ka la sdang ha ka rukom kaba khlaiñ ïa ka samoi bad ka la paw ruh kum ka kynhun ka ban ïaknieh nam lahduh ha ka SPL 2025, hynrei katkum ka jingkheiñ, mynta kam don jingkyrmen shuh ba kan lah ban pyndep ha ka kyrdan ba ha khlieh duh. Ka dang sah ha ka kyrdan kaba saw da kaba kamai 13 point.
Ka Nangkiew Irat ka la wan sha kane ka jingïakhun khlem ki katto katne ngut ki rangïalehkai ba kongsan namar ka jingshah sospon, ka jingmynsaw bad kiwei pat ki daw, kum u nongthep kol ba bun tam jong ka kynhun, u Himanshu Patil, u Khangmiki Pale bad u nongap kol ba kynsai jong ka u Surjay Kumar Pariyar. Katba ka Mylliem pat ka don ïa ka kynhun kaba pura lait noh tang u Shaibor Nongrum.
U Wanshanlang Dkhar u la ïoh ïa ka kabu kaba paka ban buh hakhmat ïa ka Mylliem ha ka minit kaba 19 hynrei ka jingpyrshang jong u ka la long lehnoh ei namar u khlem shym la lah ban phah ïa ka bol sha ka jaka kaba dei ban rung.
Watla katta ruh, u la ïarap ïa ka kynhun da kaba noh synñiang ïa ka bol pashat na ka liang kadiang, kaba u Alem u la donkam tang ban pyndei tiak ban pynrung jlang ïa ka bol shapoh kol, kaba dei artad ka kol kaba pynïakhlad ïa kine ki arliang mamla ha kane ka jingïalehkai. Da kane ka kol u Alem u la kynjoh mynta 6 kol, bad u don lang ha ka kyrdan ba ar ryngkat bad u Himanshu bad u Emanbha Marbaniang ka Shillong Lajong ha ka jingïaknieh ban ïoh ïa ka khusnam Top Scorer, uba ïalam hakhmat duh dei u Loving Suting ka Mawlai uba la thep 7 kol.
Ka Nangkiew Irat ka la ïoh ban tehlakam bun shah ïa ka bol ha baroh ar kylla jong kane ka jingïakhun hynrei kam shym la lah pat ban thaw ïa ki kabu ha ka por ba ka ïoh bat ïa ka bol. Watla ki la don katto katne ki khyllipmat kiba don jingkyrmen kim shym la lah ban pyntreikam hok.
Ka Nangkiew Irat ka dang sah sa kawei ka jingïalehkai ban pyndep, pyrshah ïa ka Lajong ha ka jingïalehkai ba khatduh jong ka samoi, katba ka Mylliem kan aireng pyrshah ïa ka Rangdajied United ha ka jingïalehkai ba khatduh jong ki.
Ha kane ka sngi Lah sngi U Blei, ka Nongrim Hills, kaba la thikna ba kan pyndep ha ka thup kyrdan ban shah weng (relegation zone), kan aireng pyrshah ïa ka Lajong ha ka por 4:30 baje janmiet. Ka jingjop kan pynïoh biang ïa ka Lajong ban wanphai hakhlieh duh jong ka miej.
