Jowai, Risaw 12: Ka kynhun ïalehkai jong ka Khliehmyntang Ialong kala ïoh ban rah ïa ka nam lahduh haka lympung ‘8th Debo Shullai Memorial Trophy Second Division Football 2025’ bala pynïaid daka West Jaiñtia District Sports Association (WJDSA) hadien ba ka la lah ban pynliem noh ïa ka Lumpyrtuh Mihmyntdu ha ka jingïakhun phainal kaba la long haka sngi Saitjaiñ, 11 tarik u Risaw, ha madan Kiang Nangbah Stadium Dongmihsngi, Jowai.
Haba phai sha kane ka jingïakhun phainal, ka Khliehmyntang Ialong kala la jop da 2-0 kol ïaka Lumpyrtuh Mihmyntdu.
Hadien ka jingïakhun kaba ïakhaid bad kaba thylli kol ha ka kylla step ka Khliehmyntang Ialong kala mih madan kham khlaiñ ha ka kylla kaba ar ban thep ïa ki ar tylli ki kol lyngba u Bashanbor Pale haka minit ba 42 bad u Suni Rymbai haki minit pynjlan ba khatduh (80+3).
Na ka liang jong ka Lumpyrtuh Mihmyntdu kala pyrshang ka la trei shitom katba lah ban pynphai hynrei kam shym la ïohlad satia haduh kaba kut jong ka por, kaba la pynlong ïa ka kynhun ban mad ïa ka namrem.
Ka jingïalehkai kaba kyrpang jong u Suni Rymbai (Khliehmyntang Ialong) ha ka phainal ka la pynlong ïa u ban khur ïa ka khusnam Man of the Match.
Nalor ki khusnam sha ka lahduh ki la don ruh ki khusnam shimet sha ki rangïalehkai ba kynsai. ïa ka khusnam Best Goal Keeper la khur da u Seibor Rymbai jong ka Khliehmyntang Ialong, katba ïaka nam Player of the Tournament ka la leit sha u Serene Dkhar ka Lumpyrtuh Mihmyntdu.
Ki la don lai ngut ki rangïalehkai kiba la ïoh lang (joint) ïa ka nam ‘Top Scorer’, kiba kynthup ïa u Arwanki Rymbai naka Lumpyrtuh Mihmyntdu, u Bashanbor Pale naka Khliehmyntang Ialong bad u Shemphng Phalangki naka Iawmulong Nartiang, ha kaba baroh lai ki la thep 6 kol.
