MWSL 2025: Ka Diengshynrum kaba nyngkong ban buh jaka ha ka QF; jop ka Na Rympei & Bright Future

Shillong, Oct 12: Ka Diengshynrum SC ka la kylla long ka kynhun ba nyngkong eh ban ïohrung sha ka Quarter Final jong ka Meghalaya Women’s State League 2025 hadien ba ka la lah ban pynskhem ïa ka kyrdan ba ha khlieh duh ha ka Group C ha ka sngi Saitjaiñ.
Ha ka Group C ki don tang ar tylli ki kynhun kiba ïakhun, ka Diengshynrum kaba mihkhmat ïa ka East Jaintia Hills District Football Association bad ka Chirupheiwi Nongkynrih FC jong ka Laskein Block Sports Association. Kumta ki la ïalehkai tang ar sien, hala ïing bad shabar (home & away), bad katkum ka jingpynïaid, tang ka kynhun kaba wan ha khlieh duh kan jam shakhmat sha ka Quaterfinal. Ka Diengshynrum ka la jop ruh da 2-0 kol ha ka jingïalehkai kaba nyngkong kaba la long ha ka 02 tarik Risaw.
Ka Charlinda Nongtdu (8’, 43’ 72’ 85’) ka la pynkhihjar marwei haduh 4 kol na ka bynta ka Diengshynrum ha ka jingïakhun hala ïing ha ka sngi Saitjaiñ ha Khliehriat, nangta ka Saphapaya Lyngdoh (12’), ka Deimonme Lyngdoh (26’) bad ka Hapily Lyngdoh (78’) ki la ïoh ban thep mar kawei.
Ha kawei pat ka jingïalehkai jong ka Group A, ka Na Rympei FA ka la khie im biang hadien ba ka la shah rem ha ki ar tylli ki jingïalehkai ba nyngkong jong ka ban pynliem kput ïa ka Lapalang SSCC haduh 14-0 kol. Ka Pynhun Shulet ka la ïalam lynti da kaba thep 7 kol (7’, 18’, 21’, 38’, 63’ 88’, 90’), katba kiwei pat ki kol la thep da ka Daai (19′), ka Remika (22′, 42′), ka Tracy Rympei (30′), ka Streamlet Taro (45′), ka Iawanlang Nongbet (54′) bad ka Wanmi Kharpan (60′).
Ki don san tylli ki kynhun ha ka Group A, ha kaba yn jied tang lai tylli ki kynhun kiba wan hakhmat eh ban ïohrung sha ka wat ïakhun knockout. Ka Laitkor SC, ka Pay For Right FA bad ka Na Rympei ki dei ki lai tylli ki kynhun kiba ha khlieh duh ha kane ka por.
Ki la don ar tylli ki jingïalehkai ha ka Group B ha ka sngi Saitjaiñ, ka jingïakhun hapdeng ka Mawlum Tyrsad SC bad ka Mawten SC ka la kut ha ka jingïakhaid khlem da don ba lah ban pynkhihjar (0-0). Ha ka jingïalehkai kaba bud, ka Bright Future SSCC ka la pynliem noh ïa ka Mawsawrit SC da 4-0 lyngba ki kol jong ka Ricika Basawiawmoit (5’, 39’), ka B Thongni (50’) bad ka H Nongrum (88’).
Ka Group B ka dei kaba heh tam na baroh, ha kaba ki don 6 tylli ki kynhun bad ki saw tylli kiba ha khmat eh kin ïoh jaka ha ka Quarterfinal. Kumba ka long mynta ka Mawlum Tyrsad SC, ka Bright Future, ka Mawten bad ka Young SSCC kidei ki saw tylli ki kynhun kiba wan ha khlieh duh.
Ha kane ka sngi Nyngkong kan don tang kawei ka jingïalehkai, ha kaba ka Pay For Right FA kan aireng pyrshah ïa ka Attacker’s Youth Club ha ka por 10 baje mynstep ha ka Group A ha Shillong.