U-19 Vinoo Mankad Trophy: Watla khur 5 wiket u Mewankitbok, shah rem ka Meghalaya ha ka Manipur

Shillong, Oct 12: U Mewankitbok Kharpuri u la wanrah biang ïa ka jingïalehkai kaba kyrpang jong u ha ka boling ban khur 5/32 pyrshah ïa ka Manipur hynrei ka jingduna jong ka Meghalaya ha ka liang ka tied (batting), ka la pynlong ïa ka kynhun ban shah rem noh da 172 ron ha kawei na ki jingïalehkai plate group jong ka lympung U-19 men’s Vinoo Mankad Trophy 2025-26 ha Chandigarh ha ka sngi Saitjaiñ.
Ka Manipur ka la jop ïa ka jingkynting pisa (toss) bad ka la rai ban tied nyngkong, ka la kamai 236 ron shuwa ban khyllem baroh ki nongtied (all out) ha ki 43 ober ïa kaba ka Meghalaya ka la jubab tang 64 ron bad khyllem lut ki nongtied ha ki 22.3 ober.
Kane ka dei ka jingshah rem kaba ar jong ka Meghalaya hadien ba ka la mad ïa ka nam rem ha ka 09 tarik u Risaw ha ka jingïakhun pyrshah ïa ka Sikkim. Nangta, u Mewankitbok u la khur 4 wiket, kynthup ïa ka hat-trick.
Ka jingïakhun ha ka sngi Saitjaiñ, u Apandanka Marak u la ïoh ban khur 2/39, katba kiwei pat kiba lah ban pynkhyllem wiket ki long u Angkit Tamang (1/20), u Benedict Jones Makdoh (1/32) bad u Ashish Kumar Lohar (1/36). Ha kane ka jingïakhun, u Mewankitbok ym tang ba u la long u nongkawang bol ba seisoh tam jong ka Meghalaya hynrei udei uba jwat tam ïa ka kynhun liang pyrshah ba kan kamai ron, da kaba ïohlad tang 32 ron na ki 10 ober ba u la pyndep.
Ha ka por ba beh kthong ïa ka ron ba la buh, dei tang u Gaurav Narleng (25 ron naki 30 bol) bad u Dipayan Nandi (12 ron naki 13 bol) kiba la lah ban kynjoh sha ka phew ron namar ka jingtbit palat ka Manipur ha ka liang ki nong bol.
Ka jingïalehkai ban wan jong ka Meghalaya’ kan long pyrshah ïa ka Arunachal Pradesh ha kane ka sngi Nyngkong.
Ha kajuh ka por, ka jingïalehkai plate group jong ka lympung Senior Women’s T20 Trophy 2025-26, ba la pynlong ha Agartala ka la bteng ïa ka jingsniew bok. Ka suiñbneng kaba slap ka la bteng ban long ka jingeh, ha kaba baroh lai tylli ki jingïalehkai jong ka Meghalaya ki la shah pynsangeh, kynthup ïa ka jingïalehkai hynnin ka sngi Saitjaiñ pyrshah ïa ka Arunachal. Ka Meghalaya ka dei ban ïakhun pyrshah ïa ka Nagaland ha ka sngi Nyngkong.