Lyngba ki die bapher bapher, sdang ka Expo Advertising ïa ka 13th International Leo Expo 2025

Shillong, Risaw 11: Ka Leo Advertising da ka jingsngew sarong ka pynbna ïa ka jingsdang ïa ka 13th International Leo Expo 2025, kaba wanrah ka jingkylla ïa ka khana pateng jong ka Madan Polo (SRGT Ground) sha ka jaka jong ka jingïadie ïathied, ka kolshor bad ki jingrakhe. Kane ka Expo kaba la ap kmang da kiba bun ka la wan biang ha Nongbah ha kaba da ki hajar ngut ki nongwan jngoh ki la wan sha kane ka jaka ban mad bad ban wan ïathied ïa ki jingdie ha kane ka Carnival kaba long mynta u snem.
Ha kane ka Expo la wan ban ïashim bynta na ki nongwan jngoh kiba na ka ri bad kumjuh ruh ki ri ka pyrthei kiba kynthup na ka ri Iran, Afghanistan, Thailand, Dubai, bad kiwei pat ki ri. Kiba wan sha kane ka Expo ki lah ban wad ïa kiba bun ki tiar kiba kynthup naduh ki riam ki beit, ki jingdeng kiba kynthup ruh ïa ki tiar ba ju wah ha la ki ïing ki sem, ki tiar ba shna da ki kti kum ki shuki, ki meij, nangta ki tiar halor ka koit ka khiah bad ki marbam kiba kongsan.
Ba la pynlong da ka Leo Advertising, ïa kane ka Expo la plie ha ka 3 tarik mynta u bnai bad kan neh haduh ka 22 tarik mynta u bnai. Ka jingthmu jong kane ka Expo ka long ban kyntiew ïa ki kam khaïi, ka jingïasam ïa ki kolshor, bad ki jingshna bapher bapher kiba pyni ïa ki jingïapher lyngba ki kam khaïi bad ki kam shna kti.
Ha kane ka Expo ki don ruh ki tiar kiba tyrwa ki jingpynhiar dor, nangta ki jingtyrwa ki bapher bapher kiba kynthup ïa ki tiar kum ki shuki ba shna da ki dieng bad kiwei kiwei. La pynwandur ruh ïa kane ka Expo kum ka jingmyntoi na ka bynta ki longïing longsem, nangta ki don ruh ki zone kiba dei halor ki kam entertainment, ki food court, ki selfie station bad kiwei kiwei.
Haba kren ha ka prokram, ki nongpynïaid ki pynpaw ka jingïaroh da kaba ong, “Ka Leo Expo ka la long barabor kaba pynïasoh ïa ki paidbah lyngba ki kolshor, ki kam khaïi bad ki lad jingshna nalade. Ngi sngewkmen ruh ban ïohi ïa ki jingsakhi lang bad ki jingjubab na ki paidbah ka Shillong sa shisien pat ha kane ka Expo.”