Nongpoh, Risaw 4: Ka Hynniewtrep National Youth Front (HNYF) ha ka 4 tarik Risaw ka la pynskhem ïa ki nongkitkam ba thymmai jong ka Nongpoh Circle, ki ban khmih ïa ka khia ka shon jong ki paidbah ka thaiñ.
Ïa ki nongkitkam ba thymmai la pynskhem da u Bah Tyllibor Swer General Secretary HNYF sengkmie ha ka jingdonlang u Bah Alfred Mallai, general secretary HNYF Northern Region, u Bah Robinson Umbah, Finance Secretary HNFY, Northern Region lem bad kiwei kiwei ki nongïalam na ka Sengkmie bad Northern Region.
Ki nongïalam ba thymmai ka HNYF Nongpoh Circle, ki kynthup ïa u Kyrshan Uriah kum u President, u Bah Never Syngkli Vice-President, u Birbor Khongbeh General Secretary, u Bah Jomson L. Mawnai kum u Asst General Secretary lem bad kiwei kiwei.
Haba kren ha kane ka sngi, u Bah Tyllibor Swer General Secretary HNYF sengkmie, u la pynpaw ïa ka jingkmen kaba khraw ban ïohi ïa ka mynsiem shakri paidbah kaba shitrhem jong ki samla kiba la pynïasoh sha ka seng ban ai ïa ka jingshakri sha u paidbah ka dong ka thaiñ bad ruh ban peitngor ïa ki jingsniew kiba don hapdeng ka sor Nongpoh.
U la ai mynsiem ba kum ki nongkitkam ka seng ki dei ban long kiba ïatylli bad kiba sngewthuh jingmut haba ki don kino kino ki mat kiba ki hap ban mih shakhmat ki dei ban long kiba kloi ban ïa kit ïa bah lem na ka bynta ka jingeh bad ka khia ka shon, ryngkat ka jingkyntu ïa kitei ki nongïalam ba thymmai ban long ki samla kiba sngewrit kiba longka nuksa ba bha ïa kiwei bad khamtam ban kiar na kino kino ki kam kiba pynthoh bria ïa ka kyrteng jong ka seng.
