Jowai, Risaw, 05: Ka Loompyrdi Ïongpiah Dorbar Shnong Jowai ha kane ka 5 tarik u Risaw ka la pynlong ïa ka jingïakynduh lang ba kyrpang ha Yungwalieh jong ka shnong, ha kaba ki khun ka shnong naduh ki khun samla, ki riew rangbah bad ki longkmie ki la wanban ïashim bynta lang.
Ïa ka jingïalang la pynïaid da u samla Kwelly Challam bad ka samla Iwakani Challam, na ka liang u Bah Pynsakhiat Ieini Kyndiah, Kñi ka Loompyrdi Ïongpiah ula ai ka jingnguhblai, u Bah R.L. Bimee Suwer, Waheh Shnong ka Loompyrdi Ïongpiah ula ai ki kyntien lamphrang halor ka thong jong kane ka sngi kaba ong “Kob Yei Nam”, ka jingkren na ka longkmie P. Shullai, na ka samla Synchar Pyrbot kiba la shah pynkup burom ha kane ka sngi bad kumjuh na u Bah Marbun Laloo uwei na ki nongthoh Drama ka Loompyrdi Ïongpiah.
U Bah R.L.Bimee Suwer ha ka jingkren ula ong ka jingthmu ban pynlong ïa kane ka jingïakynduh lang ka long ban wanrah ïa ka jingïajuh ïajan bad ka jingïaieit hapdeng ki khun jong ka shnong bad ka nongrim ban tur shaphrang ban wanrah ka bha ka miat jong ka lawei.
Ha kane ka sngi la pynkup burom ïa ki 16 ngut ki longkmie bad ki longkpa kiba la kynjoh sha ka rta kaba 70 snem, 4 ngut ki nongthoh drama ha ka por Bamphalar, 14 ngut ki khun samla kiba la ïoh 60% shaneng ha ka SSLC Examination, 13 ngut ha ka HSSLC Examination, 6 ngut kiba la pyndep ïa ka Graduate bad 7 ngut kiba pyndep ïa ka Post Graduate.
U Bah Pearlet Toi uwei na ki riewrangbha ka shnong Loompyrdi Ïongpiah ha ka jingkren ula pynkynmaw ïa ka jinglong ka ïingdorbar (Yungwalieh) jong ka shnong kaba la kylla dur nadong shading haba phai sha ki por mynshaw, da kaba ong kane ka pyni ba ka Dorbar Shnong ka la ïaid shakhmat katkum ka jingïaid ka por. Ha ka juh ka por ula ai mynsiem bad kitbok ïa ki khun ka shnong kiba la shah pynkup burom ha kane ka sngi.
Ka Dorbar Chnong Loompyrdi Ïongpiah ka la pynkup burom kumjuh ïa ka Dr. Wakani Toi ka khun jong ka kong Best Toi bad u Bah Arun Lanong, kaba dei kawei na ki khun ka shnong kaba la pyndep ïa ka kyrdan pule MBBS, ha kane ka sngi la leh burom ïa u Waheh K.F.Laloo da kaba aiti ïa ka Muhor Sahnam sha kiba haïing hasem jong u.
La pynphuh pynphieng shuh shuh ïa kane ka sngi da ki jingrwai, ki jingshad ba la shim bynta da ki khun samla, ki longkmie bad ki khynnah skul ka Loompyrdi Ïongpiah, katba ïa ki kyntien ai khublei la ïoh na u Bah Wansalan E Dhar, General Secretary ka Loompyrdi Ïongpiah.
