Nongpoh, Risaw, 04: Ha kawei ka jingjia aksiden kaba sngew shyrkhei, saw ngut ki heprit kynthei ki la duh noh ïa la ka jong ka jingim hadien ba kawei ka trok kit skum dieng ka la rat katba ki dang ïaid lynti ha ka shnong Thadrang, Ri-Bhoi District.
Kane ka la jia ha ka sngi Thohdieng ha ka por kumba 6:30 baje janmiet. Ha kane ka jingjia, lai ngut ki heprit kynthei ki la khladnoh hashen bad iwei pat iba la mynsaw jur i la khladnoh ha ka step sngi Saitjaiñ, katba iwei pat i la mynsaw jur.
Ki heprit kynthei kiba la khladnoh la tip kyrteng kum i heprit Phibanpyntngen Rynjah, 13 snem ka rta, i heprit Lashimti Nongrum 13 snem, i samla Theresa Nongrum, 19 snem ka rta bad i heprit Ridahunlang Nongrum 13 snem ka rta kiba sah ha ka shnong Thadrang Madan Lyngbah, Mawlasnai, Ri-Bhoi District.
Katba iwei pat iba la mynsaw jur i dei iba la tip kyrteng kum i heprit Iupharisa Nongrum, 11 snem ka rta na ka shnongThadrang Madan Lyngbah, Mawlasnai, Ri-Bhoi District.
U kyrwoh ba la phah da u Senior Superintendent of Police ka Ribhoi District, u la pyntip ba kane ka la jia katba ka trok kit skum dieng kaba don ïa u number ML05 AC 8447 ka dang wan na ki thaiñ Jowai hynrei namar ka jingpynher sted shaba palat jong u nongñiah kat haduh ba um lah shuh ban synshar ïa u lakam ka kali ka la leit tynrah beit beit ïa ki heprit kiba dang ïaid lynti.
U nongñiah uba la tip kyrteng kum u Bah Ferlindes Rymbai 34 snem ka rta na Laitkor, East Khasi Hills ryngkat bad u nongbud uba la tip kyrteng kum u Dwayne Dkhar, 31 snem ka rta na ka shnong Khliehtyrshi, West Jaiñtia Hills ki la mynsaw na ka jingkylla khongpong ka trok hadien ka jingjia.
Ki Pulit ka Mawlasnai Out Post kiba la ïoh jingtip halor kane ka jingjia ki la leit ban ai jingïarap bad ban pynkit noh ïa baroh kiba mynsaw sha Bhoirymbong CHC.
Ïa ka met jong ki saw ngut kiba la khladnoh ki Pulit ki la aiti noh sha ki bahaing hadien ba la pyndep ïa ka jingleh postmortem na ka bynta ban ïoh pyndep ïa ka jinglehniam bakhatduh.
Ki Pulit ki la kurup noh ïa ka kali bad ki la kem ruh ïa u nongñiah trok. Ka jingtohkit halor kane ka jingjia mynta ka dang ïaid shakhmat.
