Pyllait ka UIDAI ïa ka jingsiew pynthymmai ka Aadhaar Biometric ïa ki khynnah ha ka rta 7-15 snem
New Delhi, Risaw 04: Ha ka sienjam kaba ïarap ïa ki paidbah, ka Unique Identification Authority of India (UIDAI) ka la pyllait noh ïa baroh ki jingsiew na ka bynta ka Mandatory Biometric Update (MBU-1), ka sienjam kaba la khmih lynti ba kan ai jingmyntoi ïa kumba 6 klur ngut ki khynnah.
Ka jingpyllait na ka jingsiew MBU na ka bynta katei ka rta ba la kdew ka la treikam naduh ka 1 tarik u Risaw 2025 bad kan treikam haduh shisnem.
U khynnah uba hapoh san snem ka rta u pynrung kyrteng na ka bynta ka Aadhaar da kaba ai ïa ka dur, ka kyrteng, ka tarik sngi kha, shynrang ne kynthei, ka jaka sah bad ka syrnot sngi kha. Ïa ki dak shympriahkti bad iris biometrics jong u khynnah ym shym la shim na ka bynta ban pynrung kyrteng Aadhaar hapoh ka rta kaba san snem namar ba kine kim pat long kiba la san ha katei ka rta.
Katkum ki kyndon kiba la don lypa, namarkata, ki dak shympriahkti, iris bad ka dur ki long kiba donkam ban pynthymmai ha ka Aadhaar jong u/ka ynda u khynnah u la dap san snem. Ïa kane la khot ka Mandatory Biometric Update (MBU) kaba nyngkong. Kumjuh ruh u khynnah u dei ban pynthymmai biang sa shisien ïa ka biometrics ynda u la dap 15 snem, ïa kaba la khot ka MBU kaba ar.
Ka MBU kaba nyngkong bad kaba ar, lada leh hapdeng ka rta kaba 5-7 bad 15-17 snem, kumta ki long kiba lait na ka jingsiew. Hadien kata, la buh ïa ka jingsiew kaba long T. 125/- shi MBU. Da kane ka rai, ka MBU mynta ka long kaba lait na ka jingsiew na ka bynta baroh ki khynnah ha ka rta 5-17 snem.
Ka Aadhaar ryngkat bad ka biometric ba la pynthymmai ka pynsuk ïa ka rukom im bad pynthikna ïa ka jingpyndonkam khlem jingeh ïa u Aadhaar ha kaba ïoh ïa ki jingshakri kum ka jingpdiang skul, ka jingpynrung kyrteng na ka bynta ki entrance eksam, ka jingïoh ïa ki jingmyntoi jong ki scholarship, ki skhim DBT (Direct Benefit Transfer), bad kiwei kiwei hangno hangno ba donkam. La kyntu ïa ki kmie ki kpa/ ki nongsumar ba kin pynthymmai ïa ki biometrics jong ki khun jong ki ha ka Aadhaar, bad ban shimkhia ïa kane.