Ka kot shaphang u Bah Hoping Stone ka jingnoh synñiang sha ka histori jong ka jylla: Conrad

Shillong, Nailur 29: Kum shi bynta jong ka jingkynmaw burom ïa ka lyngkhuh sngi khlad noh kaba shiphew jong u nongïalam ba pawnam ka jylla u (L) Bah Hoping Stone Lyngdoh, ha ka sngi Nyngkong u Myntri Rangbah ka jylla u Conrad K. Sangma ula pyllait paidbah ïa ka kot “Individual and History: A Biography of Hoping Stone Lyngdoh (1929-2015)” ha ka jingïalang kaba la long ha ka ïingsah ka jong u hapoh Shillong ha ka jingïadonlang u nongthoh bad kiwei kiwei.
Lah ban ong ba Ïa katei ka kot la thoh da u Dr. David Arnold Kharchandy bad ha kane ka kot la thoh shaphang ka jingim, ki kam kiba la leh da u Bah Hoping Stone Lyngdoh, uba long uwei na ki nongïalam seng saiñ pyrthei uba ki paidbah ki burom bha.
Lah ban pynkynmaw ba une u nongïalam u dei uba la bna nam bha halor ka jingïengskhem ha ka nongrim, ka jinglong kaba sngewrit bad uba don ïa ka jingïadei kaba ïajan bha bad ki paidbah. U (L) Bah Hoping Stone Lyngdoh ula ai ïa ka jingshakri kaba bha ïa ka jylla bad ïoh ruh ïa ka jingïaroh bad jingphaikhmat na kiba bun balang khamtam ha kaba ïadei bad ka jingïai bteng ka jong u ban shakri ïa ki paidbah bad khamtam eh haba ïadei bad u pud u sam ki khana kiba la ju jia bha sha ki thaiñ Langpih.
U Myntri Rangbah u Conrad K. Sangma haba pyllait ia kane ka kot ula ïaroh ïa u Dr. Kharchandy uba la trei minot ha ka ban lum ïa ki jingtip bad ban buh ha ki jingthoh shaphang ka jingim jong une u nongïalam uba la iehnoh ïa ki kam kiba khraw ha ka bynta jong ka kam saiñ pyrthei bad ïa ka imlang sahlang ha ka jylla Meghalaya baroh kawei.
Na ka liang jong u, ula pynpaw ba kane ka ‘Biography’ ym tang ba kan pynneh pynsah ïa ki jingsah jingkynmaw bad ïa ka jingïohi jngai jong une u nongthaw aiñ ka jylla hynrei kan long ruh kum ka jingnoh synniang kaba kongsan sha ka histori jong ka jylla.
La ong ba kane ka kot ka ai ïa ka jingbatai da kaba la ngam jylliew bha shaphang ka jingim jong u Hoping Stone Lyngdoh ha ka jingïaid lynti ha ka kam saiñ pyrthei, ki nongrim bad ki bynta kiba ïadei bad ka histori ha ka jingai jingshakri ka jong u, kiba la pynmih ïa ki jingtip kiba kongsan na ka bynta ki Scholar, samla pule bad ki nongshong shnong.