Ka Lynnong Uranium ka la kut ha Meghalaya, da leilei ruh ngin ym ailad satia: Dy.CM

Shillong, Nailur 28 : Ka sorkar jylla ka la pyneh lang ba kan ym shah satia ban khlong ïa u mar Uranium naki bynta jong ka jylla bad pynkynmaw ruh ba kane ka ishu kadei kaba la pynduh pyndam la slem bha.
Ka nongrim jongka sorkar jylla ka long kaba shai bha ba ngin ym shah satia ïa kane. Kane kadei ka jaka ba hap ha ka Khyrnit ba Hynriew jong ka Riti Synshar jong ka Ri bad kumta ngim dei ban klet ba ka khyndew ka shyiap ka dei jong ka District Council bad jong ki riew shimet, jong ka Kur, jong u Syiem lane jong ka Raid,ong u Symbud Myntri Rangbah ka Jylla, Bah Prestone Tynsong haba kren bad ki lad pathai khubor hadien ka jingjurip ïa ka jingpyntrei ïa ka surok Shillong Dawki.
Kane ka jingkren jong u Symbud Myntri Rangbah kadei hadien ba ka la mih ka jingpyrshah kiba jur na ki seng saiñpyrthei kumjuh ki sengbhalang ïa ka Office Memorandum (OM) jong ka Ministry of Environment, Forest and Climate Change (MoEFCC) kaba la pynmih ïa ka jingpynbna ban weng noh ïa ka ‘Public Hearing’ ha ba ïadei ka jingtih ïa ki mar poh khyndew.
Shuh shuh u ong ruh ba yn ym lah ban ïaid lyngba khlem ka jingmynjur jong ki trai jaka, ka jingmynjur jong ki district council bad u la ong ruh ba bym lah long ba yn ai ïa kata ka jingbit ba kin tih ïa ki marpoh khyndew na ka jylla.
U Bah Prestone u la ong ba kin ym lah ban klet ïa ka hukum jong ka Supreme Court ha u snem 2019 kaba la ai bad pynskhem ba ha Meghalaya ka khyndew ka shyiap bad ka jaka puta ka dei jong ki trai bad ki riewshimet bad jong ka District Council.
“Kumta ngim dei ban tieng ban smiej ïa kane bad na ka liang ka sorkar ruh ngin ym shah lano lano ruh ba kan ïaid katkum kato ka Office Memorandum ba ka Ministry of Forest ka pynmih ha kine ki khyndiat sngi” u la bynrap biang.
Nalorkata, u Symbud Myntri Rangbah u ong ba dei ruh ban sngewthuh ba ha Meghalaya ka jaka puta dei jong ka District Council bad jong ki trai. Kumta u ong ba lada ki trai jaka kim kwah ban ai ym don sorkar India ne kino kino ki kyndon kiba lah ban pynbor ia kata.
“Dei na kata ka daw ba ngi na ka liang ka sorkar jylla ngi kwah ban ong ba ka sobjek tih Uranium ka la kut namar ba ki trai jaka horkit hordang kim kwah ban ai bad ki district council kam kwah ban ai. Kumta na ka liang ka sorkar jylla ruh ngi mynjur lang namar ka jaka kam dei jong ka sorkar jylla hynrei ka dei ka jaka jong ki riew shimet, ka jaka jong ki Kur, Raid, Shnong bad kiwei kiwei,” bynrap shuh shuh u Symbud Myntri Rangbah.
Halor ka jingkylli la ka sorkar kan thoh neem sha ka sorkar India halor kane, u Bah Prestone u ong ba ïa mynta hi um pat lah ban ong ei ei namar ki dang hap ban shong ïa ka Kynhun Myntri bad lada donkam ban phah da ka jingthoh sha ka sorkar India ruh kin sa leh ka kata.
“Tangba ka khubor kaba shai hi na ka sorkar Jylla ka long ba yn ym shah satia ban tih Uranium khnang ba ki paidbah ruh kin sngewthuh ïa ka nongrim jong ka sorkar,” u la ong.