Shillong, Nailur 08 : U MLA ka VPP na Shillong North, Bah Adelbert Nongrum u la pynpaw ïa ka jingsngew diaw ha ka sngi sdang jong ka Ïing Dorbar Thawain ka jylla da kaba ong ba u la shah leh kiar watla u dang dei u MLA jong ka VPP.
Da kaba pynsngew ïa kane ha Ïing Dorbar, u Bah Adelbert u la ong ba u kwah ban pan jingshai ba na kaei ka daw ba watla u dang dei u MLA jong ka VPP u shah leh kumne. “Balei phi buh ïanga ban shong shadien,” u la ong.
Haba u Lamphang ka Ïing Dorbar, u Thomas A Sangma u la kylli hapoh kano ka kyndon ba u la rah ïa katei ka mat, na ka liang u Bah Adelbert u la pynshai ba um shym la rah ïa ka point of order hynrei u la pan jingshai halor ka jingshah sospon jong u.
Shuh shuh u la ïasaid ba ka jingshah sospon jong u kadei kaba beain bad ong, “Kim shym la kdew ïanga kum u MLA ka North Shillong (ha ka shithi sospon) hynrei ki kdew ïanga tang kum u Adelbert Nongrum, Shillong.”
Halor kane, u Lamphang u la kular ba un bishar bniah ïa kane ka kam.
“Ïa kane ka mat ngin sa ïatai bha ha kamra jongnga hadien,” ong u Lamphang da kaba kdew ba ka por kam ïahap satia ban ïatai ïa kane hapoh Ïing Dorbar.
