Shillong, Nailur 08: U Lamphang ka Ïingdorbar u Thomas A Sangma u la rai ban bteng ha ka ban ithuh ïa u MLA ka North Shillong Bah Adelbert Nongrum kum u dkhot ka Voice of the People Party (VPP) haba pynpaw ba ka shithi sospon, kam dei kaba la phah sha u kum u MLA.
U la ong, “Nga la ïoh pdiang ïa ka shithi (sospon). Ka dei ka jingshisha ba ula shah sospon na ka party hynrei ngam lah pat ban pdiang ïa ka naba ka shithi sospon ba la phah sha nga, la phah sha u Bah Adelbert Nongrum, tang kum u Adelbert Nongrum (Jaïaw). Ki lah ban don bun ki Adelbert Nongrum kiba sah ha kajuh ka shnong.” Haba kylli, u Thomas ula ong, “Kumba nga ong, u dang dei shi bynta jong ka VPP Legislative Party. Ula shah sospon bad ïa kane la pyntip ruh sha ngi hynrei ka shithi sospon kam shym la pynpaw ïa u kum u MLA. Ula shu shah sospon tang na ka party, ym na ka Legislative Party. Kane ka dei kaba ngi sngew. Ta ka daw u dang dei u dkhot ka VPP Legislative Party”.
Hynrei, u Lamphang ula pynpaw ba u Bah Nongrum ula wanrah ïa kane ka kam hapoh ka Ïingdorbar khlem da ïaid kat kum ki lynti ba dei ban ïaid, naba u khlem kdew ïa kano kano ka point of order.
Na ka liang u Lamphang u la pynpaw ba katba u Bah Adelbert u don ïa ka hok ban rah jingkylli kum u nongmihkhmat ba jied u paidbah, u dei pat ban ïaid kat kum ki lynti kiba la buh.
U Lamphang ula khot ïa u Bah Adelbert sha ka kamra jong u ban ïakren bad pynbeit ïa kane ka kam.
U Lamphang u la pynpaw ruh ba ka jingpynkynriah ïa ka jaka shong jong u Bah Adelbert ka lah ban dei jingleh bakla jong ka Assembly Secretariat.
Haba ong ba u Bah Adelbert u dang dei u dkhot ka VPP Legislative Party, u Lamphang ula bthah ba dei ban buh biang ïa ka jaka shong u Bah Adelbert ha ka jaka ba la ai naduh nyngkong.
