Pynkup burom ka SSCM ïa ki 152 ngut ki samla pule kiba la pyndep bha ïa ka Graduate

Mawkyrwat, ‘Nailur 03 : Kum ka dak jong ka jingaimynsiem na ka bynta ki samla pule kiba la pass ha ki jingïaleh eksam, ka Sngap Syiem College, Mawkyrwat ka la ïoh ban pynkup burom ïa ki 152 ngut ki samla pule kiba la pyndep bha ïa ka kyrdan Graduate kata ka long ha ka Arts Stream, Commerce bad Science kaba dei jong u snem 2025 hapoh ka skulbah North Eastern Hill University (NEHU).
Ha kane ka Graduation Day ne ka sngi pynkup burom ïa ki samla pule, u Satinder Kumar Bhalla, ITS, Secretary, North Eastern Council (NEC), jong ka sorkar India u la long kongsan bad ha ka jingkren jong u u la pynpaw ïa ka jingsngewkmen kaba khraw ba u la ïoh ban ïuhkjat ha kane ka College kaba la pynneh pynsah ïa ka nam ka burom jong u Syiem Sngap, uba la ïaleh ban ïoh ïa ka jingsynshar laitluid na kiwei pat ki jaidbynriew.
Ym tang kata, u la ai mynsiem ruh ïa ki samla pule kiba la ïoh ïa ka jingpynkup burom ban long kiba skhem ha ka jingmut bad kin don ruh ka thong na ka bynta ka la shai la shisngi ha ka jingim, khnang ban lah ban poi sha ka jingjop bad ïoh ban kiew ha kiwei pat ki kyrdan kiba kham hajrong.
Kiwei de kiba la ïadon ryngkat ki long naduh u Dr. K.K. Nongsiej uba dei u Principal jong ka Sngap Syiem College, ka Kong J. Kharshi-ïing, Adviser Planning jong ka North Eastern Council (NEC), u Bah Jeo Syiem, In-charge Tourism Sector North Eastern Council (NEC), ki nonghikai, ki kmie ki kpa bad ki samla pule.
Kiwei de ki prokram ha kane ka sngi ki long ka jingkren pdiang na u Dr. T. Lyngkhoi, Professor jong ka Political Science, ka jingrwai kyrpang na ka VTC Music, ka jingkren lyngkot na ka Ribankerlin Lyngdoh, bad ka jingkren khublei na u babu P. Warjri.