Shillong, Nailur 01 : U MLA ka HSPDP na Mawthadraishan, ba dei ruh u Myntri ka tnad Sports bad Labour Bah Shakliar Warjri ha ka sngi Nyngkong u la ong ba ka rai ban kylliang shuki ka shong beit ha ka party ban shim ïa ka rai kaba khatduh bad u kloi ruh ban kohnguh ïa kaei kaba ka party ka rai.
Haba kren bad ki lad pathai khubor, u Bah Shakliar u la ong ruh ba na ka liang jong u hi um don ei ei hynrei ban shaniah beit ha ka party ban rai. “Ïa kane nga shaniah ha ka kam pohïing jong ka party ban rai bad lada ka party hi ka rai ba ngan hap ban hiar shuki nga long uba kloi,” u la bynrap shuh shuh.
Ka HSPDP ka don arngut ki MLA kata u MLA ka Mawthadraishan Bah Shakliar Warjri bad u MLA ka Mawshynrut Bah Methodius Dkhar.
Lah ban kdew hangne ba ha ka samoi ba la dep, ka HSPDP ka la pyntreikam ïa ka jingbhah shuki mar shiteng samoi hapdeng ki arngut ki MLA jong ka.
