Shillong, Nailur 01: Ka seng saiñ pyrthei ka National People party ha ka sngi Nyngkong ka la rakhe ïa ka sngi kha kaba la 13 snem bad kumjuh ïa ka sngi kha jong u Late Purno A Sangma ha ophis jong ka seng ha Lower Lachumiere Shillong.
ïa kane ka prokam la pynïaid ïa ka jingïalang da u Bah Ransom Sutnga State Secretary ka NPP ha ka jingïadonlang u Bah L Pamthied General Secretary.
Ha kane ka sngi ka la don ruh ka jingkyntiew ïa ka lama da u Babeth K Sangma uba dei u nongseng bad kumjuh u Bah Ransom Sutnga, la don ruh ka jingbuh syntiew na ki dkhot ka NPP, NPYF bad NPWF.
Na ka liang jong u Bah Bajop Pyngrope Working President ka NPYF u la ong ba kane ka ka jingrakhe ka dei kaba kongsan tam ha ka jylla bad kumjuh ruh ha ka ri baroh kawei.
“U la dei u nongïalam uba jrong tam jong kane ka thaiñ shatei lamihngi,” ong u Bah Bajop.
Na ka liang jong u Babeth K Sangma u la pynkynmaw ïa ki kam ba la trei da u Late PA Sangma ïa ka jylla bad khamtam ïa kane ka thaiñ shatei lammihngi.
“U la long teng u Lamphang ka Ïingdorbar thaw aiñ, u la long teng u Myntri ka sorkar pdeng bad kumjuh ruh u la ïakhun ïa ka shuki President,” ong u Babeth Sangma.
Katba u Bah Ransom Sutnga ha ka jingkren jong u kum u lamphang u la ai ka jingïaroh ïa ka seng NPP kaba la pynlong ïa kane ka prokram kaba la kynmaw burom ïa ka Lynkhuh sngi kha jong u Late P A Sangma bad ong ruh ba kane ka dei ka sngi ka ban wanrah ïa ka jingïatylli ha ka seng.
