Phla ki nongñiah kali Tourist na EJH ba shah talasi ha ki jaka ba kynjah ha Ri Bhoi

Khliehriat, Nailar, 21: Ki nongïalam jong ka East Jaiñtia Hills District Tourist Driver’s Association (EJHDTDA) bad nongïalam jong ka Ïatyllilang Drivers and Torist Taxi Association (IDTTA) bad ki nongñiah kali Tourist kiba ju kamai na Ladrymbai sha Guahati bad sha kiwei kiwei ki jaka ki la pynpaw ka jingsngewkhia namar ka jingdon ki briew kiba ju bat ïa ki kali Tourist ba ki kamai da kaba talasi ïa ki kot ki sla jong ki nongshnong kali ha ki jaka kiba kynjah ha Ri Bhoi District.
Ha ka jingïakren bad u Mawphor hadien ba la wai ka jingïalang ha ka shnong Mookhep, ki la ong ba kane ka jingbat ïa ki kali bunsien ka ju buh jingsyier, jingma ïa kiba ñiah kali bad kumjuh ruh ïa kiba shong kali.
U President jong ka IDTTA u Bah Happy Rymbai kumjuh ruh uba ñiah ïa ka kali Tourist na East Jaiñtia Hills District ki la ïathuh ba ka la don kawei ka miet ba uwei uba shong kali u la mynsaw jur na ka jingshah tynrah ha kawei pat ka kali Maruti kaba dang ïaid ha surok ha Ri Bhoi District na ka daw ba ki don ki briew kiba talasi ïa ka kali ha kaba ki la phah hiar lut ïa kiba shong kali. Katba kiba shong ha kali ki dang ki dang hiar kynsan kynsan la wan kawei ka kali Maruti ka la tynrah ïa uwei u briew uba hiar na ka Tourist Taxi bad mynsaw jur.
Halor kane ki nongïalam bad ki nongñiah kali Tourist ki la pynpaw ka jingsngew khia namar ha ka jingshisha ki Pulit bad ki dkhot sengbhalang kiba talasi ha ka Infiltration Check-gate ha Ri Bhoi ki ladep bishar lut ïa ki kot ki sla bad ki la pyllait ïa ki kali ba ki ñiah hynrei kaba sngewphylla pat ka long ba dang don sa kiwei pat ki briew kiba bat ïa ki kali ha kiwei pat ki jaka ba kynjah bad ki ju dawa pisa ruh na kiba ñiah kali.
Ki nongïalam jong kitei ki Association na East Jaiñtia Hills ki la pyni ruh ïa ki sakhi satar halor ka jingphah pisa sha kiba dawa pisa ha lynti bad ha ka 18 tarik mynta u bnai ki la ujor da ka ejahar sha ki Pulit ka Nongpoh Police Station bad ki la ong ruh ba kim shym poi pyrkhat bad kita kiba bat ïa ki kali bad dawa pisa ki dei pynban ki nongïalam sengbhalang jong ka seng Hynñiewtrep National Youth Movement (HNYM) ba la ïalam da u Sparly Syngkli.
U Secretary ka ITDDA Bah Rimio Nongtdu, u la ong ba ki Association kim kynnoh ïa kano kano ka sengbhalang bad lada ki sengbhalang ki trei ïa ka kam kaba bha ki kloi ban ai ka jingïatreilang ruh bad bynrap ruh da kaba ong, “namarba ngi ju ïakynduh jingeh manla ka por khamtam ha ka por mynmiet ki nongñiah kali kiba ñiah ïa ki kali Tourist ki ju ïathuh ba kiba bat bad talasi ïa ki kali ki ju mih ha surok ha ka por shiteng synnia bad talasi ïa ki kali. Kine kiba ñiah kali ki ju kit ïa ki nongleit jingleit na Guwahati kiba wan shangkai kum ki Tourist, don kiba wan trei bad ynda poi ha ki jaka talasi ha Infiltration Check Post ki kali kim ju phet bad ynda la dep bishar ïa ki kot ki sla ïa ki kali la pyllait noh bad ynda poi sha kawei ka jaka pat ki don biang sa kiwei pat kiba talasi ïa ki kali. Kane ka buh jingma shisha ïa kiba ñiah kali bad ïa kiba shong kali bad ruh ba ka dei ka jaka kaba kynjah ba shah bat ïa ki kali.
U la ong ba teng teng kiba ñiah kali ki hap ban phet krad hynrei kita ki briew ki buddien ïa ki kali bad lada kiba ñiah kali ki pynieng ne sangeh ïa ka kali kito kiba bat ïa ki kali kim ju treh hi ruh ban ïakren bad ki nongïalam ka Association ne bad ki trai kali lyngba ka telephone. Lada ki nongñiah kali ki kyntu ban leit sha thanat ban ïapynbeit hangta ruh kim ju treh hynrei kita kiba bat ïa ki kali ki ong beit ban ai da ka pisa.
“Haba kim don kano kano ka jingpynshisha kum ki Identity Card kumno ngin shaniah bad kumno ngin tip ba ki dei kiei, namar ngi la sngew kynduh jingeh kum ki nongïalam ngi hap ban ujor noh da ka ejahar ha Nongpoh Police Station,”u la ong.
U Bah Happy Rymbai u kyntu ïa ka tnat Pulit ban shimkhia na ka bynta ka jingshngaiñ ka leit ka wan jong kiba ñiah kali bad kiba shong kali bad ong ruh ki Association kim don kano kano ka jingsngew pher lada shah pynphai noh ki nongshong kali ki bym biang ki kot ki sla namar ban bishar ïa ki kot ki sla kam dei ka kamram jong ki nongñiah kali hynrei ka dei ka kamram ha ki Infiltration Check Post.
U la kyntu ïa ki bor Pulit ban shimkhia bha halor kane ba kam dei shuh ban nang jia nangne shakhmat.