Shillong, Nailar 17: Ka Women’s Cell bad Internal Quality Assurance Cell (IQAC) jong ka Shillong Law College bad ka Meghalaya State Commission for Women (MSCW) ha kine ki sngi ba la dep ki la ïasoi ïa ka Memorandum of Understanding (MoU) ban pynïoh ïa ka hok kaba kumjuh ïa ki kynthei bad shynrang bad ban pynsngewthuh ha kaba ïadei bad ki aiñ ki kanun.
Katkum ka kyrwoh khubor la ïathuh ba ïa kane ka jingsoi ïa ka Soskular la pynlong ha ka ophis treikam jong ka Women’s Commission, ha kaba la ïadonlang ka Chairperson jong ka MSCW, ka Kong Iamonlang M. Syiem, u Principal jong ka Shillong Law College u Dr. Sharif Uddin, ka IQAC Co-ordinator ka Dr. Daiahunlin Mawlong, ka Women’s Cell Convener Dr. Arpita Singh bad ki dkhot ka MSCW nalor kiwei kiwei.
La ïathuh ruh ba ka jingthmu jong kane ka soskular ka long ban don ka jingïatreilang hapdeng kine ki ar tylli ki kynhun na ka bynta ban pynsngewthuh ïa ki aiñ ki kanun, ban leh ïa ki jingwad bniah, ban pynlong ïa ki prokram da kaba phaikhmat sha ka hok jong ki longkmie bad ka jingai ïa ka hok kaba mar kumjuh ïa ki shynrang bad kynthei.
Ki la khmih lynti ruh ba lyngba kane ka jingïatreilang yn plie lad ban pynlong ïa ki prokram, workshop, legal aid clinic bad ki prokram ban ai ïa ki jingpynsngewthuh ïa ki khynnah skul, ki paidbah bad ïa ki briew jong ka aiñ haba ïadei bad kane ka bynta.
Ka kyrwoh ka ong ba kane ka jingïatreilang kadei ruh da ka jingkhmih lynti ba kan long ka jingplie lad ïa ki samla pule kiba leh ïa ka Internships, Research halor ki mat kiba ïadei bad ki longkmie bad ban leh ïa ki kam kiba ïadonbynta bad ka imlang sahlang kaba donkam bha mynta.
