Khliehriat, Nailar 17: Ka kynhun ïalehkai jong ka Suchen Lumiarain SC kala long syndon ka lahduh haka kyrdan 3rd Division 2025 League Stage, bala pynïaid daka East Jaiñtia Hills District Football Association (EJHDFA) kaba la long ha ka 16 tarik u Nailar, 2025 jong ka sngi saitjaiñ ha madan Artificial Turf kaba ha Diengshynrum, Khliehriat East Jaiñtia Hills District.
Kane ka jingjop jong ka Suchen Lumiarain SC kala wan hadien ba kala pynliem da 3-2 kol ïa ka Narwan SCSC da ka jingïashut Tie Breaker, haba phai sha ka jingïakhun naduh ka kylla step haduh ka kylla miet bad ka Extra Time kila poi sha ka jingïakhaid khlem don kiba ïoh ban thep kol.
Ha kane ka lympung 3rd Division mynta u snem ïaka nam Player of the Match la ïoh da u Deibormi Shadap naka Narwan SCSC, ïa ka nam Player of the Tournament la ïoh da u Miki Suiam naka Narwan SCSC, ïa ka nam Best Goalkeeper la ïoh da u Da o hi Shadap na ka Narwan SCSC bad ka nam Top Scorers la ïoh da u Wanmi Lamurong na ka Suchen Lumiarain SC.
Ïa ki khusnam sha ki nongjop la sam da u kongsan jong kane ka sngi u Dr Tammiyaki Shylla u Block Development Officer, EJHD ha ryngkat ka jingdonlang u MDC ka Jalaphet Brisumer u ma Krison Langstang, ki nongkitkam bad ki Dkhot jong ka EJHDFA nalor kiwei kiwei de.
Na ka bynta ka kynhun kaba ïoh rah ïa ka nam lahduh, kata ka Suchen Lumiarain SC kala ïoh khurïa ka khusnam pisa kaba 20 hajar tyngka lem bad ka trophy, katba ka kynhun ba wan ba ar ka Narwan SCSC kala ïoh 10 hajar lem bad ka trophy.
