Durand Cup 2025: Pynthikna ka NorthEast United ïa ka semi final pyrshah ïa ka Shillong Lajong

Shillong, Nailar 17: Ka kynhun ba bat ïa ka nam lahduh ka NorthEast United FC, ka la sei madan ïa ka rukom ïalehkai ba khlaiñbor jong ka ban pynjemkhnap ïa ka Bodoland FC da 4-0 kol hakhmat ki paidbah kiba la pyndap ïa ka SAI Stadium ha Kokrajhar, hynnin ka janmiet jong ka sngi Saitjaiñ bad ban rung sha ka semifinal jong ka 134th Durand Cup 2025.
U rangïalehkai ba shakhmat ka Morocco, u Alaaeddine Ajaraie (29’, 61’) u la pynkhih ar tylli ki kol, katba u rangïalehkai na Spain u Andy Garcia (53’) bad u Parthib Gogoi (90’+2) uba la mih bujli ki la ïoh ban kyntiew ïa la ka jong ka kyrteng ha ka thup kol, ha kaba ka NEUFC ka la pynthikna ïa ka jingïakhun semi final pyrshah ïa ka Shillong Lajong FC.
U Vikash Panthi u la sei madan ïa ka kynhun ha ka rukom ïalehkai kaba 4-2-3-1. Katba na ka liang jong u head coach ka NEUFC u Juan Pedro Benali, u la sei madan biang ïa ka kynhun ba khlaiñ jong u hadien ba u la pynshong pynjahthait ïa katto katne ki player ha ka jingïalehkai group stage kaba khatduh, ha ka rukom ïalehkai kaba 4-3-3.
Ka kol kaba nyngkong ka la urlong ha ka minit kaba 29. Ka jingbym lah tehlakam ki rangapdien ka Bodoland ka la ai lad ïa u Jithin ban pashat ïa ka bol sha u Ajaraie uba la thep ïa ka bol bad buh hakhmat ïa ka lahduh.
Ka Bodoland ka wanphai da kaba tyngeh ha ka kylla miet, hynrei ka la shah pynshitom biang ha ka minit kaba 53 lyngba u Andy. Kane ka dei ruh ka kol kaba nyngkong ïa u ne u rangïalehkai na Spain na ka bynta ka klob kaba thymmai jong u.
Phra minit hadien u Ajaraie u la pynkhihjar biang. Ka bol pashat kaba thikna na u Thoi Singh na ka liang kamon ka la shem ïa une u nong Morocco, uba la pynshad ïa ka bol lyngba u nongap kol bad ki rangapdien ka liang pyrshah shuwa ban pynkhih ïa ka kol kaba ar bad kaba lai na ka bynta ka kynhun.
Ka kol kaba khatduh ka la wan ha ki minit pynjlan ba khatduh lyngba u Parthib Gogoi.
Shuwa kane, ka Lajong ka la pynliem ïa ka Indian Navy da kaba wanphai nadien ban jop ïa ka Quarter final da 2-1 kol ha JN Stadium ha Shillong. Kane ka mut ba ka Lajong bad ka NEUFC kin ïakhun biang ha Shillong ha ka sien kaba ar jong kane ka Durand Cup 2025 bad ka sien kaba lai ha ki ar tylli ki Durand Cup (2024 & 2025).
Lah ban kdew ba ha u snem ba la dep, ka NorthEast United ka la pynliem ïa ka Lajong ha ka semifinal da 3-0 kol, bad mynta u snem ha ka jingïakhun group stage, ka NEUFC ka la pynliem ïa ka Lajong da 2-1 kol.
Watla ka shah rem hynrei ka jingïalehkai kaba dang shen ka pyni ba ka Lajong ka la nang kham khlaiñ bad ka buit ïalehkai jong ka-ka la long ka jingma ïa baroh ki kynhun liang pyrshah ba ka ïakynduh, bad la sngewthuh ba ka Lajong kan phaikhmat ban kyntiew shuh ïa ka buit lehkai jong ka. Ka Semifinal kan long ha Shillong ha ka 19 tarik Nailar naduh ka por 7 baje janmiet.