Mawkyrwat, Nailar 14 : Mynta ka 14 tarik u Nailar 2025, ki Nongïalam jong ka Hynñiewtrep National Youth Front (HNYF) hapoh ka Ranikor Circle bad ka Dangar Balat Border Area Circle, ha ryngkat ka jingïadonlang u President ka HNYF Southern Border Area, u bah Kyllang Thongni, ki la pynlong ïa ka jingïalang kyrkieh ban ïa thir sani halor ka jingai jaka sop sop jong u Syiem ka Hima Maharam bad ka Executive Dorbar ïa ki shipai BSF ha Pomula.
Ka seng ka pynpaw ïa ka jingsngewkhia halor kane ka jingpyrshang ban leh donbor jong u Syiem khlem da shim ïa ka jingmynjur jong ki khun ki hajar. “Ha ka jingshisha u dei ban lum ïa ka Durbar Paidbah ban ïapylliew jingmut halor kane ka kam kaba khia bad kaba ktah ïa ka imlang sahlang,” la ong ki Nongïalam ka HNYF.
Ki la pynpaw ruh ba ki jaka raid kim dei ban long marwei jong u Syiem hynrei ki dei jong u paidbah—ki khun ki hajar jong ka Hima—bad dei ban pyndonkam ïa ki na ka bynta ki nongrep. Hynrei ka jingïalam bakla bad ka jingkhwan shimet ka la pynlong ïa ka jingbym pyrkhat ïa ka bha ka miat u paidbah, khamtam ha ka por ba u Syiem u dei ban long u nongap bad nongpynneh ïa ka burom bad ka bha ka Hima.
Ka HNYF ka ai khublei bad ka kyrshan ruh ïa ka sien jam jong ka Khasi Students’ Union (KSU) kaba la shim ban ïeng pyrshah ïa kane ka jingthmu.
Shuh shuh, ki Nongïalam ka HNYF ki phah ruh ka jingkyrwoh sha baroh ki Nongsynshar Hima, ki Syiem, ki Sordar bad ki Wahadar ba kim dei ban shim rai khlem bishar bniah shuwa halor ka jingpynïa peiñ ïa ka khyndew ka shyiap tang na ka bynta ka myntoi shimet, hynrei dei ban peit ïa ka bha ka miat jong ka imlang sahlang.
