Jowai, Nailar, 10: Ka Hynñiewtrep Integrated Territorial Organization (HITO) Thangraiñ Unit ha ka 8 tarik mynta u bnai ka la leit ban aiti da ka jingthoh ha u Executive Engineer ka tnat PWD South Shangpung Division West Jaiñtia Hills District halor ka jingjot rathai jong ka surok naduh Thangraiñ shaduh Barato.
Ka seng hadien ka jingïoh ujor na ki nongshong shnong ka tei ka thaiñ bad ka jingshem shitom jong ki ban ïaid na utei u surok uba la jot rathai bad kane ka la laktah shibun eh ïa ka leit ka wan jong ki khamtam ïa ki nongpang ki armet bad don ki por ruh ba kin hap ban kha khun wat hapoh kali namar ka jingsniew palat jong u surok.
Namar ba ka dei ka por slap kiba bun ki bynta jong ka surok ki la shah tyllep lut ha ka um namar bym don ki nala ki ba biang. Dei ha kane ka nongrim ka Seng ka dawa na katei ka ophis treikam ba kan shimkhia ban pynshna kloi noh ïa utei u surok, khnang ba ki nongshong shnong jong katei ka thaiñ khamtam kito kiba pang ba shitom kin poi ha ka por ba biang ha ki jaka sumar.
Na ka liang ka seng ka la pyntip hadien ba la dep ujor ïa kane ka jingdawa sha u EE ka tnad PWD, lada ki bor ba dei peit kim lah ban shimkhia ka seng kam banse ban shim da kiwei pat ki sienjam, la pynkut ka kyrwoh na u President samla Nidathrang Sariang bad u Finance Secretary samla Rinal Biam.
