SHILLONG, Nailar 10: Ka Shillong Lajong FC ka la mad ïa ka nam rem kaba nyngkong ha kane ka Durand Cup 2025 da 1-2 kol pyrshah ïa ka NorthEast United FC, kaba bat ïa ka nam lahduh ha ka jingïakhun North East Derby kaba jur bha ha ka sngi Thohdieng (08 tarik Nailar). Da kaba jam sha ka jingïakhun hadien ka jingjop ïa ka Malaysia bad ïa ka Rangdajied FC, kane ka Derby la khmihlynti ba kan long ka jingtynjuh kaba jwat ïa ka Lajong ha kaba sdang jong ka samoi bad kum ka lad ban pynpaw pyrthei pyrshah ïa kawei na ki klob ba khlaiñ jong ka thaiñ.
Naduh kaba sdang, ka Lajong ka la paw ba ka la kut jingmut ban pynskhem ïa ka bor jong ka ha kane ka lympung. Da kaba bat bad pynneh ïa ka rukom ïalehkai ban pynkhlaiñ shakhmat, ki la ñion ha ka rukom kaba dei, bad la sakhi ruh ba katto katne minit ka la lah ban teh lakam ïa ka bol.
Watla ka kynhun ka la mad ïa ka nam rem hynrei na ka liang jong u coach rangbah u Birendra Thapa u la dap da ka jingïaroh ïa ka jingshimkhia ba la pyni da ki rangïalehkai jong u.
“Ka la long ka jingïakhun derby kaba itynnat bha bad Nga sngew sarong shisha shibun ïa ki khynnah, ka rukom ïalehkai jong Ngi – jop ne rem hynrei Nga sngewkmen ïa ki khynnah shynrang. Nga sngewkmen ïa ka rukom ïalehkai jong Ngi. Ngi la ai ïa kaba bha tam, hynrei Ngim shym la lah ban jop,” u la ong.
Ki la don ruh katto katne ngut ki rangïalehkai ka Shillong Lajong kiba la khring ïa ka khmat jong kiba bun ha katei ka jingïakhun, bad u Thapa u la kloi ban pdiang ïa ki jingnoh synñiang jong ki.
“U Sheen, u Damaitphang, bad u Figo uba la thep ïa ka kol ki la long kiba tbit. Baroh ki la ïalehkai bha,” u la bynrap.
Hynrei pyrshah ïa ka NorthEast United, wat ka jingbakla kaba rit tam ruh ka lah ban long kaba rem dor, khamtam eh haba u nongthep kol ba hakhmat eh jong ka samoi ba la dep, u Alaaeddine Ajaraie, u la ïalam hakhmat.
“Hadien ba la thep ïa ka kol Ngim lah ban pynhap ïa ka bol ha u rangïalehkai ba tbit tam ha ka ISL uba la thep bun tam ki kol ha ka samoi ba la dep (Alaaeddine Ajaraie). Ngi la donkam ban pyrkhing bha ïa u. Ngi la ai ar tylli ki kabu bad u la thep ar kol,” la ong u Thapa.
Ki ar kol jong u Ajaraie ka la pynkylla ïa ka jingïalehkai, hynrei ka Lajong ka la bteng ban ïaid shakhmat ban wad ïa ka kol ban pynïakhaid, da kaba pyni ïa kajuh ka mynsiem ïalehkai kaba la pynpaw ha ki jingïakhun ba ladep haduh mynta.
Na ka bynta u Thapa, ka rukom ïalehkai ha kane ka derby ka la pynskhem biang ïa ka jingaiti jong u ïa ka jinglong taktik jong ka kynhun.
“Naduh ka jingïalehkai kaba nyngkong ka buit jong Ngi ka long ban ïalehkai phutbol kaba shlur, ban ïai ñion shakhmat, ban tehlakam ïa ka bol. Kano kano ka kynhun kaba Ngi ïakynduh Ngi hap ban bteng da kajuh ka buit,” u la ong, da kaba pynshai ba ka Lajong kan ym pynduh ïa kane ka buit ïalehkai jong ki.
Katba ka jingïaroh ka la leit sha ka NorthEast United ha kane ka kynti, ka jingïalehkai ba shlur jong ka Lajong hakhmat ki paidbah ka la long ka jingpynkynmaw ïa ka jinglong jong kane ka kynhun.
Kumba ka paw ka Lajong ka la dep ban pynthikna ïalade ban jam sha ka wat ïakhun Quarter final ha kane ka Durand Cup 2025 da kaba kamai 6 point naki lai sien ïakhun.
