Jowai, Nailar, 08: Ka Pnar Student Movement (PSM), hynne ka sngi Thohdieng 8.08.2025, ka la leit ban khang khyrdep syndon ïa ka ophi treikam jong ka Company Jio kaba don ha nongbah Jowai, kane ka jingleit khang jong ka seng ïa katei ka ophis, ka long ba hadien ba ka seng ka la ïoh ïa ki jingujor na ki paidbah babun balang kiba dei ki nongshong shnong jong ka Ri Lum Jaiñtia, ha ka jingïadei bad ka jingbyntrei kam bha ka Network Jio ha kiba bun ki jaka jong ka Ri Lum Jaiñtia.
Kumta na ka liang ka seng mynta ka sngi ka la leit mih sha kane ka ophis bad ka la shim ïa ka rai ban khang tala syndon ïa kane ka ophis, hadien ka jingleit jurip ïa kane ka ophis treikam la lap ruh ba don tang ar ngut ki nongtrei ne ki staff ha kaba bun tang ki shuki, kat katei ka ophis ba heh ka ban ai ka jingshakri ïa ki paidbah ha nongbah Jowai bad sha kiwei de ki bynta jong ka Ri Lum Jaiñtia.
Ka seng ka la ong ruh haba ki paidbah kiba pyndonkam da ka Jio Number sha ki Bank Account jong ki, kumjuh ruh sha ki ophis sorkar bapher bapher ki hap ban bteng ban recharge ïa ka Jio number jong ki, namar ki la pyndonkam naduh ba sdang, kumjuh ruh la ong ba ha kipor ba la leit ne mynshwa ka network Jio ka long kaba ïaid beit ïaid ryntih hynrei mynta pat ka la pynthut shi kat dei eh ïa ki paidbah.
Kumta na ka liang ka PSM ka la bthah ïa kane ka Company ba kam pat dei ban plie ïa kane ka ophis jong ka, katba kam pat lah ban pynbiang ïa ka Network jong ka kat kum ka jingdonkam jong ki paidbah, ong u Vice President PSM u samla Owan S Paswet.
