Pynrung QF u Ajaraie ïa ka NorthEast United FC da kaba thep 2 kol

Shillong, Nailar 08: Ki ar kol jong u Alaaeddine Ajaraie (5 & 83’minit) ki la pynthikna ïa ka kynhun kaba bat ïa ka nam lahduh, ka NorthEast United FC ban pynliem ïa ka Shillong Lajong FC da 2-1 kol ha ka jingïakhun ‘NorthEast derby’ kaba itynnat kaba la long ha Jawaharlal Nehru Stadium, Polo. Kane ka jingjop ka la pynskhem ruh ïa ka jaka na ka bynta ka NEUFC ha ka wat ïakhun quarterfinal.
Katba ka shi kol jong ka Shillong Lajong la thep da u Figo Syndai (81’minit). Kane ka dei ka jingjop kaba ar sien lynter jong ka NorthEast United FC ha ka Group E ha kaba ka la ïoh ban kamai 6 point bad sah sa kawei ka jingïalehkai, katba ka Shillong Lajong ka la pyndep ïa ka group stage kumjuh da hynriew point naki lai sien ïakhun. Ka shi point ha ka jingïakhun kaba dang sah na ka bynta ka NorthEast United kan pynthikna ïa kane ka kynhun ban rung sha ka quarterfinal kum ka nongjop ha ka Group.
U Head Coach u Juan Pedro Benali bad u Birendra Thapa ki la pynïalehkai ïa ki nongïalehkai ba kynsai tam na ka bynta kane ka jingïakhun kaba kongsan da kaba pynkylla 6 bad 5 tylli ki bynta ha ka kynhun. U manager na Spain u la wanrah ïa u nongap kol u Gurmeet Singh, u rangïalehkai ba dang shu soi thymmai u Jose Manuel Nunez Martin, u Asheer Akhtar, u Lalrinzuala, u Redeem Tlang bad u Buanthanglun Samte katba ka kynhun ïalehkai hala ïing ka la wanrah ïa u Kitboklang Khyriem, u Saveme Tariang, u Damaitphangndkson Lyngdoh bad u Sodra.
U snar thep kol ba kynsai u Alaaeddine Ajaraie u la bteng ïa ka jingïalehkai kaba kyrpang jong u ha India, da kaba thep ïa ka kol kaba nyngkong tang hadien 5 minit ba la ïaid ka kylla step ban buh hakhmat ïa ka NEUFC.
Hadien kane, ka Shillong Lajong kaba ïalehkai hala ïing, kam shym la shong kli kti bad ka la ïai bteng ban thaw ïa ki lad ki lynti ban pyrshang pynphai ïa katei ka shi kol, da kaba pyndonkam ïa ka jingstet jong u Sheen Stevenson bad u Phrangki Buam ha baroh arliang ki wing katba u Everbrightson Sana hapdeng madan. U Gurmeet Singh u la pynpaw ïa ka jingtbit jong da kaba khanglad lai tylli ki jingpyrshang ban khanglad ïa ka Shillong Lajong ban ïoh ïa ka kol pynïakhaid. U la pynkiar sharud ïa ka jingpyrshang kaba kham jam jong u Phrangki Buam shuwa ban khanglad ruh ïa u Sheen Stevenson.
Ha ka kylla miet ka jingïakhun ka la nang jur ha baroh arliang ki la pyneh triang ïa la ki jong ki rangïalehkai ba shakhmat bad kumjuh ruh shadien, bad kim shym la ailad ban thaw ïa kino kino ki lad kiba paka.
Ka jingïalehkai ka la khie im biang ha ki shiphew minit ba khatduh, ha kaba ka Shillong Lajong ka la ïoh ban pynïakhaid ha ka minit kaba 81 lyngba u Figo Syndai, uba la mih bujli ha ka kylla miet. Hynrei ka jingrisa jong ki nongkyrshan ka Shillong Lajong ka la neh shipor ha kaba u Ajaraie u la pynsngapjar ïa ki da kaba thep ïa ka kol kaba ar ha ka minit kaba 83. Kane ka kol ka la biang pura ïa ka NorthEast ban pynthikna ïa ki lai point bad ban long ka kynhun kaba ar na kane ka Group ban ïoh rung sha ka wat ïakhun quarterfinal.