SHILLONG, Nailar 08: Kum shi bynta ban kyntiew ïa ka jingïalehkai Table Tennis ha ka nongbah Shillong na ka liang jong ka Laban Sports Club Table Tennis Academy [LSCTTA] kan pynlong ïa ka lympung ïalehkai Table Tennis kaba ar sngi lynter, kaba la tip da ka 4th Meghalaya Open Table Tennis Cash Prize Tournament, 2025.
Kane ka lympung kan sdang naduh ka 12 tarik haduh 13 tarik Nailur, 2025 bad yn pynlong ïa ki jingïalehkai ha Laban Sports Club Indoor Hall, Shillong. Ka LSCTTA ka la pynbna ruh ba ka khusnam pisa baroh ka long T 1.5 lak.
Kane ka lympung kan kynthup ïa ki kyrdan ïalehkai bapher bapher ba la phiah katkum ka snem jong ki nongïashim bynta (shynrang bad kynthei). Baroh ki jingïalehkai kin long katkum ki kyndon ïalehkai knockout jong ka TTFI.
Ki kyrdan ïalehkai ki long kumne: ki jingïakhun para marwei ha ka Under 13 shynrang bad kynthei (Kiba kha ha lane shuwa ka 01 tarik Kyllalyngkot, 2013); nangta ka Under 15 shynrang bad kynthei (Kiba kha ha lane shuwa ka 01 tarik Kyllalyngkot, 2011); ka kyrdan ïakhun para marwei (single) jong kiba la heh shynrang bad kynthei (Men & Women Singles) kaba plie ïa baroh; bad kumjuh ka kyrdan ïakhun kaba mar shijur jong ki shynrang lane ka Men Doubles.
Nalor kitei ki kyrdan ba la kdew, ka don ruh ka kyrdan ïakhun kaba para marwei jong ki rangbah lane Veteran Men Single (kiba la palat 50 snem shaneng); bad nangta ka Veteran Men Doubles (kiba la palat 50 snem shaneng).
Yn rai ïa ka kynhun shijur jong ka Veteran Men Doubles da ka lottery hakhmat u Referee ba khlieh duh.
Ka por ba khatduh ban pynrung kyrteng kan long ha ka 10 tarik Nailur, 2025 (haduh ka por 5 baje janmiet). Na ka bynta ki jingtip ba kham bñiah phi lah ban phone ha kine ki number; 8787605291/ 8259003012.
