Shillong, Nailar 04: Ka Umrynjah SC bad ka Nongumlong SC ki la jop ïala ki jong ki jong ki jingïalehkai hynne ka sngi Nyngkong jong ka lympung Third Division Football League 2025 ba la pynïaid da ka Shillong Sports Association, ha madan First Ground-SSA Stadium, Polo.
Ka Umrynjah SC ka la pynliem ïa ka Umlyngka SC ha ka jingïalehkai kaba nyngkong, katba ka Nongumlong ka la pynliem noh ïa ka Madanryting SC ha ka jingïalehkai kaba bud.
Na ka bynta ka Umrynjah ka jingjop ïa ka Umlyngka ka la pynthikna ïa ka kyrdan ba nyngkong ha ka Group B, watla baroh arliang ki ladep ban pynthikna ïa ka jaka ha ka wat ïakhun Quarter final shuwa kane ka jingïalehkai.
Ka shi kol na u Banshemphang Nongkhlaw (39’minit) ha ka kylla step ka la biang pura ïa ka Umrynjah ban pyndep ïa ka wat ïakhun kaba nyngkong da kaba kamai pura 12 point.
Katba na ka liang jong ka Nongumlong ka jingjop kaba shongkun da 6-2 kol pyrshah ïa ka Madanryting ka la pynthikna ïa ka jaka ha ka quarterfinal na ka Group A.
Baroh hynriew tylli ki kol na ka bynta ka Nongumlong la thep mar kawei da u Marques Myrthong (8′), u Nehlang Kharsohnoh (17′), u Donbor Nongneng (60′), u Kynpham Kharsohnoh (75′), u Barry Nongneng (76′) bad u Lasborn Nongbri (90’+4).
U Ryan D Shylla (81′) bad u Robert Vaiphei (82′) ki la pynkhih ïa ki ar tylli ki kol na ka bynta ka Madanrting.
