Nongstoiñ, Nailar 02 : Ka West Khasi Hills ka dei ka district kaba heh bad duh na baroh ki district ha ka jylla ka dei ruh ka district kaba ki kam pynroi ki duna haduh katta katta la ka long ha ki surok, ka umbam umdih bad ka bording.
Nadpeng ki laitylli ki Constiuency ki shnong ka Rambrai Jyrngam bad ka Mawshynrut ki dei ki Constituency kiba dang bun ki shnong ki bym pat don surok kum ki shnong kiba don ha ka thaiñ Mawkhiat kata naduh Mawshad, Umshem, Rynñiaw, Domkyrkoh, Umïong, Darephang, Nongspung,Umbah,Nongmawleiñ, Mawkhap,Mawsngi,Umyiap, Miangbyrkong, Mawdiangsnam bad kiwei kiwei hynrei ki la ïoh pat ïa ka bording eletrik na ka skhim RGVVY kaba dei ka skhim jong ka sorkar pdeng.
Ki shnong kiba hap ha ka Mawshynrut Constiuency ki bym pat don surok ki dei naduh Nongshyrkon , Nonglyer, Phodjalei, Nongkrong, Unshynrut Mawkhar, Nongsleh, bad kiwei iwei.
Ha kaba ïadei bad ka jing bym pat don surok ki paitbah ka Nongshyrkon, Umshynrut ,Nongkrong bad kiwei kiwei ki la ong ba la slem bah ki la kwah ban ïoh surok hynrei haduh mynta ki dang hap ban ïaid kjat da ki bun bun kynta ban poi ha surok kali .
Nalor kata ki la ong ruh ba lada dei ha ka por tlang te kam da jynjar than namar ki Mahindra pickup ki lah ban poi haduh shnong hynrei ha ka por lyiur te ka shitom haduh katta katta bad haba ki leit jingleit bun sien ki kali ki ju sah kut ha lynti da ki bun kynta ha surok namar ka jing sniew palat ki surok.
