Sdang kyrhuh u Sing ha Ri Bhoi, da u Bah Primson sei ka HSPDP kum u kyrtong na Umsning Constituency

Nongpoh, Jylliew 24: Shuwa ba ki paidbah ka jylla kin pynthymmai biang ïa ki nongmihkhmat na ki Constituency bapher bapher sha ka ïing Dorbar thaw aiñ hapoh ka jylla ha ka election ban jied ïa ki nongmihkhmat jong u snem 2023 ban sa wan, ki dak ki shin ba u Sing u la sdang ban kyrhuh ha Ri Bhoi ka la paw pyrthei hynin ka sngi ha kaba na ka liang ka party HSPDP ka la pynbna paidbah syndon ïa u Kyrtong u ba ïakhun na Umsning Constituency.
Shuwa ba ka party bad u kyrtong kin leit ban pan ka jingkyrshan na ki paidbah katkum ki nongrim jong ka party, ka Party HSPDP mynta ka sngi ka la lah ban pynbna noh ïa u Bah Primson Makdoh kum u kyrtong ka HSPDP ban ïa khun na Umsning Constituency ha ka jingïalang kaba la long mynta ka sngi ha Umsning Town Dorbar Auditorium Hall, Umsning.
Ïa u Bah Primson Makdoh la pynbna ba un long kum u kyrtong ka HSPDP na Umsning Constiteuncy da u President ka HSPDP Ri Bhoi, u Bah P.B Sylliang bad u President ka HSPDP na ka jylla, u Bah K.P Pangniang kiba la pdiang sngewbha ïa u ban un shim ïa ka bynta kum u kyrtong ka party ba leit sha ki paidbah halor kiba bun ki nongrim jong ka party ba ka kwah ban ai ka jingshakri bad ban wan rah ka jingkylla lada ki paidbah ki kloi ban pynjop ïa ki kyrtong ka party HSPDP.
Ha kane ka sngi, nalor ki hajar ngut ki nongkyrshan u Bah Primson Makdoh, la sakhi lang ruh da ka jingdon lang ki nongïalam ka party HPDP naduh u President ba rangbah, u Bah K.P Pangniang, u President ka HSPDP na Ri Bhoi, u Bah P.B Sylliang, u General Secretary ka HSPDP na ka jylla, u Bah Panbor Ryntathiang, President ka State Women Wing, ka Kong Badarity Lyngdoh Nonglait, u Retired IAS, u Bah C.C Mihsil bad kynthup kiwei kiwei ki nongïalam ka party na ka District bad na ka jylla.
Haba kren ha kane ka sngi kum u kyrtong ka HSPDP , u Bah Primson Makdoh u la ong ba ka daw kaba la pynlong ïa u ban mih kum uwei na u samla na Ri Bhoi ban ïa khun ha kane ka election 2023, ka dei halor ka nongrim ba u thrnang ban wan rah ki jingkylla na ka bynta ka jingmyntoi ki paidbah.
U la ong ruh ba u don kata ka thong ban kyntiew ïa ki nongrep kiba la shah iehnoh bein ha ka jylla bad kumjuh ruh ban wan rah ïa ki skulbah kiba long ka jingmyntoi na ka bynta ki khun samla. Ïa mynta u la pynpaw ruh ba um kwah ban pynpaw ïa baroh ki jingangnud, hynrei dei ki paidbah ki ban bishar lada ki kloi ban pynkup bor ban jied ïa u kum u nongmihkhmat ha kaba ka kam ka kren kham jam ban ïa ka ktien.
Kiwei kiwei ki nongïalam naduh u president ba rangbah, u Bah K.P Pangniang, u General Secretary, u bah Panbor Ryntathiang, u President ka district, u Bah P.B Sylliang bad kiwei ki nongïalam, haba kren h kane ka sngi ki la pan ka jingkyrshan na ki paidbaha ka Umsning ban kyrshan ïa u Bah Primson Makdoh bad ka daw hi ka long ba ki kwah ban pynurlong ïa ka thong jong ka party HSPDP kumba la lamkhmat da u Ma Ieid Hoping Lyngdoh, bamkwai ha Dwar u Blei.
Ki la pynpaw ruh ka HSDP ka dei kawei na ka party riewlum ba la rim tam hapoh ka jylla ba la seng naduh u snem 1968 na ka bynta ban dawa ïa la ka Khasi Jaintia State bad ha kitei ki por la ioh tang ka sub state bad kumjuh ruh ka jylla Meghalaya kaba khlem da don ki pud ki sam. Ban weng ïa ki jingeh jong ki jaid byrriew Khasi Jaintia ka dei tang lada ngi ioh la ka jong ka jylla bad ki pud ki sam ba pura bad ym kumba long mynta ka mih ka jingklumar na ka daw ka jingleh shongshit ki nongïalam kiba pdiang ïa ka jylla khlem da bishar bniah ne wad ïa ka tynrai ban ïada ïa la ka khyndew ka shyiap.
Na ka liang kitei ki nongïalam ka HSPDP ki la pynpaw ruh ba ka party HSPDP kam duh jingkyrmen wat lada ki don tang ar ngut ki MLA ba la jied da ki paidbah bad ki khmih lynti ba ha kane ka election 2023 kin lah ban pynmih bun ki MLA bad lada ki wan ha ka bor kin sa lah ban pyndep ne pynurlong katkum ka thong jong ka party HSPDP kaba pyrkhat kyrpang ïa la ka jong ka jaid bynriew.