Khliehriat jylliew 25: Ki prokram jong ka jingrakhe ïa ka sngi pyrshah drok ka dang ïaid shaid shaid ha East Jaiñtia Hills District, ha kaba na ka liang ka tnat pulit ruh ka la shimkhia ban pynlong ïa kum kane ka prokram ai jingpynshai ban pynshai paidbah halor ki jingsniew ba mih na u drok bad ïa ka prokram la pynlong ha kiba bun tylli ki shnong hapoh ka district bad mynta ka sngi ruh ka Lumshnong Police Station ka la pynlong ïa kane ka prokram ha Lumshnong Community Hall.
Nalor ka jingpynshai halor ka jingsniew u drok, ka tnat pulit ka la wanrah shuh shuh sa kiwei ruh ki mat ban ai pynshai paidbah kaba ïadei bad ka jingshngaiñ ha ka jingñiah kali (Road Safty), ban bud ïa ki aiñ ñiah kali (Traffic Rules), ki kam thombor ïa ki kynthei ki khynnah bad ka jingpynrung briew kaba beaiñ na kawei ka jaka sha kawei pat (human traficcking).
Haba kren ha ka jingialang, u Sub-Inspector jong ka Lumshnong Police Station, u bah O. Nongtdu, u la ai ki jingsneng jingkyntu ïa ki paidbah khamtam ki khynnah skul bad baroh ki samla ba kim dei da lei lei ruh ban ngop ha u drok, la ong ruh ba u drok u ktah haduh katta katta ym tang ïa ka koit ka khiah hynrei u ktah ruh wat ïa ka imlang ka sahlang baroh kawei, la ong ruh ba ka tnat pulit ka ialeh bad duriap ban rat diengkhong ïa ka jingsniew u drok bad ban rat diengkhong ïa kane yn lah dei tang lyngba ka jingiatreilang bad ki paidbah, u la kyntu jur khamtam ïa ki khynnah bad ki samla ba ki dei beit ban ong ‘Em ïa u Drok’ namar shisien ba la ngop ka long kaba eh than ban lait na ki kynjri jong u drok
Kumjuh ruh u Incharge jong ka OST Khliehriat, u Dr J.Nongttdu bad ka kong Renibet Patlong kaba dei ka dkhot jong ka MCSWA (NGO) ki la ai ki jingkren halor ki jing sniew kiba mih na u drok, ki da kyntu ruh ïa ki khynnah bad ki samla ba ki dei ban kiar na u drok, namar shisien ba la ngop ha u drok kan wanrah shibun ki jingeh ha baroh ki liang bad kan wanrah ruh ïa ka shong syier ha ki shnong ki thaw, ha ka imlang ka sahlang bad ha ki longiïng longsem jong kito kiba shah ktah ha ki jingsniew jong u drok.
Ha shwa ban pynkut ïa ka prokram, u Sub Inspector, u bahO .Nongtdu, u la ialam ha ka jingpule ïa ka jingkular lane ka Pledge ban kular skhem ban ong ‘Em ïa u drok’ bad ban nym dei satia ban ngop ha u drok, ïa ka pledge la iashim bynta da ki paidbah kiba wan sha ka jingialang ba kynthup lang ruh ki khynnah skul.
