Bthah u Myntri Rangbah ïa ki bor pynïaid distrik ban peitngor ïa ka rung ka mih ki mynder ri

Shillong, Naitung 24: U Myntri Rangbah ka jylla u Conrad K Sangma ha ka sngi Palei u la shong ka jingïalang ka high-level meeting bad u la bthah ïa ki bor pynïaid district bad ki pulit ban long kiba peitngor, khamtam ha ki thaiñ khappud marjan bad ka jylla Assam, ha kaba ka jingkyndang ïa ki poiwir beaiñ ka dang ïaid khnang ban ïada na ka jingwanrung pat sha jylla Meghalaya.
“Kane ka jingïalang la pynlong ha ka kyrdan jong nga ban ïakren ïa baroh ki jingshah ktah ha kane ka jingkyndang ba dangshen kaba la jia ha jylla Assam bad ngi ai ki jingbthah kiba donkam ban long kiba peit pyrman ha ki thaiñ khappud khamtam kito kiba don markhap bad ka Assam bad kyrpang ki thaiñ khappud kiba don hajan ki jaka ba la pynlong kane ka jingkyndang ïa ki poiwir,” ong u Sangma hadien ka jingïalang.
U la ong ba la bthah ruh ïa baroh ki deputy commissioner ban leh ïa ka jingjurip ha ki thaiñ khappud khamtam kito kiba don marjan bad ka Assam, ban ïada na kane ka jingwan rung kyrthep ki mynder ri sha jylla.
La bthah ruh ïa ki bor pynïaid District, ki pulit, ki Village Defence Parties (VDPs), bad ki khlieh nongsynshar shnong ban ïatreilang ban sam ïa ki jingtip khnang ban lah ban shim kam.
“Ka sorkar ka la ïaibteng ban ïasyllok bad ki deputy commissioner ban pynthikna ba ki deputy commissioner kin ïatreilang ha ki block, ki BDO bad kumjuh ruh ki thana, ban ïatreilang bad ki pulit, ki VDP ha ki shnong bapher bapher, ki sengbhalang bad ki khlieh nongsynshar bad baroh kine ki jingïasyllok la leh ban pynthikna ba kan ym don ka jingrung beaiñ ne ka ïaid ka ïeng kaba lah ban jia na kadaw kane ka jingkyndang kaba la jia ha Assam bad ba kam dei ban don ka jingwan rung beaiñ sha Meghalaya,” ong u Sangma.
U Myntri Rangbah u la pynskhem ba kam pat shym la don kano kano ka jingjia ba ïadei bad ka jingwan rung beaiñ ne rung tuh kaba la jia ha kano kano ka district kumba long haduh mynta bad baroh ki nongshong shnong ki la ïatreilang ban ïada na kano kano ka jingjia wanrung kyrthep ki mynder ri.
Ki don katto katne ki distrik kiba don ka jingtlot khamtam ki jaka ba khappud bad ka Assam bad ki thaiñ kiba ïajan bad ki jingkyndang ka Assam ïa ki mynder ri bad dei halor kane ba la pynleit jingmut ha kito ki district. Ha ka jingïalang bishar kam ha ka sngi Palei ha kaba baroh ki ophisar ki la ïadonlang. Ki la pyntip bad ïathuh ba kam pat don kano kano ka jingjia ha kano kano ka district bad ba baroh ki bor pynïaid district, ki pulit, ki VDP, ki village level committee bapher bapher, ki bor pynïaid shnong, ki sengbhalang bapher bapher, baroh ki la ïatreilang ban pynthikna ba lada don kano kano ka jingpyntip kaba la ïohpdiang shaphang kano kano ka jingwan rung kyrthep ki mynder ri ne ki riew shimet kiba wan, na ka liang ka sorkar mardor kan shim ïa ki kam kiba kongsan halor kane ka bynta,” u la ong.