Na ki 285 ngut kiba dei ban ïoh dukan ha MUDA, dang bun ki bym pat wan shim ïa ki slip

Shillong, Naitung 24: Kiba die madan ha Khyndailad ha ka sngi Palei ki la sdang ïa ki kam khaïi jong ki da kaba ki la rah lut baroh ki tiar ba ki die shapoh ki dukan ba la pynkhreh da ka Shillong Municipal Board.
Na ka liang kiba trei ha Shillong Municipal Board ki la ïathuh ba na ki 285 ngut kiba la buh ba kin ïoh ban shong ha kitei ki dukan thymmai hapoh MUDA dang don ruh napdeng jong ki, ki bym pat wan shim lut.
Ha kane ka sngi la ïohi ruh ba kiba die madan ki la sei ruh ïa ki tiar ki tar ban die ha kine ki dukan bad ïohi ruh ba ha sngi kaba nyngkong ki briew ruh ki la sdang ban wan ïathied.
Wat la don kiba die madan kiba la ïoh ki dukan hapoh jaka ïeng kali MUDA ki dang bteng ban die shabar ka jaka ba ki ju die mynshwa hynrei na ka liang ka municipal kam shym la ailad ka la phah lum bad phah beit ba kin leit die shapoh bad ka SMB ka la pynkhreh lypa ruh ki kali ban kit ïa ki tiar lada ki dang saitlah, hynrei hadien ba la wan ki bor pynïaid ka SMB na ka liang kiba die madan ki la hap ban lum noh ïa ki tiar ban phah kit shapoh ki dukan thymmai.
Ha kane ka sngi ka jingpynbeit ïa ki jingsam ïa ki dukan ka la long kaba ïaid beit ïaid ryntih ha kaba kam shym la don satia kano kano ka kit ïa ki mar jong kiba die madan hynrei la shu phah pynkynriah pat tang ïa kito kiba la ïoh ïa ki dukan hynrei kiba dang bteng pat ban die sha lynti ïaid kjat ka Khyndailad kumba ju leh manla ka por.
La iathuh ruh ba kane ka jingpynbeit bad ka jingsam ïa ki dukan kan dang ïaibteng beit manla ka sngi bad na ka liang ki bor pynïaid jong ka Shillong Municipal Board ha ryngkat ka jingïatreilang bad bor pulit kin bteng ban khmih ïa kito kiba die madan ki bym don ïa ki Certificate of Vending ba kim dei ban die ne khaïi ïa ki mar ki mata ha ki lynti ïaid kjat bad ha shilynter jong ka Khyndailad.