Jowai, Naitung 24: Ka Meghalaya Boxing Association (MBA), ha ryngkat ka jingïatreilang bad ka Jaiñtia Boxing Association, ka la pynlong ïa ka jingjied ïa ki nongïalehkai ne jingpynkhreh kaba la tip kum ka District-Level Selection Trial ha kane 24 tarik Naitung kum shibynta ban pynkhreh na ka bynta ka 39th National Games, kaba la buh ban pynlong ha ka jylla Meghalaya ha u snem 2027.
La pynlong ïa ki trial ha ar District jong ka Ri Lum Jaiñtia, kata ha Bishop House, Lumbihsyntu, Mihmyntdu na bynta ka West Jaiñtia Hills bad ha Indoor Hall jong ka East Jaiñtia District Sports Association ha Dkhiah East na bynta ka East Jaiñtia Hills.
La don haduh 36 ngut ki samla ïalehkai boxing kiba la shim bynta ha katei ka trial, ha kaba 21 ngut ki dei na West Jaiñtia Hills bad 15 ngut na East Jaiñtia Hills, ha ki category bapher-bapher katkum ka jingkhia (weight category).
Ïa kane ka Trial Selection la lamkhmat da u Lari Kharpran, uba long u Technical Director and Head Coach for National Team Preparation, haka jingïadonlang u President ka MBA u Cornelius Kharhunai, Secretary Dondor Marwein, Joint Secretary Khrawkupar Kharmawphlang, Executive Member Hubirth Marbaniang, u President ka Jaiñtia Boxing Association Wanbait Ksoo bad Joint Secretary, Join Secretary Jimy B. Shadap.
Hadien ka trial, yn jied 4 ne 5 ngut ki samla ba itbit ban leit sha ka training camp kaba kyrpang ha Shillong. Ynda la dep ka jingjied, yn bteng sa ka State-Level training programme kaba kham bniah shuh shuh.
