Shillong, Jylliew, 24: Ka Ingbishar Meghalaya High Court ka la rai ban buddien ïa ka jingshna ïa ka surok Agia-Medhipara-Phulbari-Tura (AMPT) ha rilum Garo ba la shna ha ka rukom ka bym ihun satia.
Ïa ka rukom shna bym skhem jong kane ka surok, ka Iingbishar ka la shong bishar ha ka ha ka sngi Thohdieng ïa ka PIL ba la ujor da u AH Hazarika.
Halor kane, ka Sorkar Jylla ka la pyntip ba ka la shim ïa ki lad ki lynti ban maramot noh marmar ïa ki bynta la sniew shaba palat jong kane ka surok, kata, da kaba mang pisa bad da kaba aiti noh ïa ka kam sha u kontraktor ban pyntrei ïa kane ka surok bad ban khot tender ruh halor ka jingshna ïa kane ka surok.
Ka Sorkar ka la phah ïa ki kot ki sla ba kdew ha kaba ïadei bad ka jingshim rai ban pyntrei noh ïa kane ka surok, hynrei ki jingpyrshang ban shna ka long tang ban ailad ïa ki kali ban ïaid, bad katto katne ki kot ki sla ki long ha kaba ïadei bad ka jingai ïa ki Work Order na ka bynta ban pyntrei ïa kane ka surok bad ïa ka notis ba la khot ïa ka tender.
Ka jingther jong u lapbah uba jur dang shen ka la pynjulor ïa ka surok rong bad kaba la donkam ban maramot noh kham kloi.
Ka Iingbishar ka la ong ba ka kyrmen ba ka jingshim jong ka Sorkar ïa ki lad ki lynti ban pyntrei noh mardor ban pynsuk ïa ki paidbah ka thaiñ ha ka leit ka wan bad ïa ki paidbah kiba pyndonkam ïa kane ka surok manla ka sngi.
Haba bthah ïa u nongmudui bad ïa ka Sorkar Jylla ban jubab halor ka jingtrei ïa ka surok, ka Iingbishar ka la ong kan sa peitngor ïa ka jingshna ïa kane ka surok, khamtam eh haba ki shnong kiba don ha rilum Garo ki la shah dkhat na kane ka surok rong khamtam eh ha ka District Headquarter.
Ka Iingbishar ka la bthah ruh ba dei ban shna marmar ïa ki thliew ki syar ha shilynter ka surok tad haduh ban da shna pyndep.
Ka jingshong bishar kan sa long biang ha ka 22 tarik, Naitung.
