Shillong, Naitung 20: U MDC ka BJP na Tura u Bernard N Marak u la kynnoh ïa ka Executive Committee ba la ïalam da ka seng National People’s Party (NPP) ba da ka jingthmu ka la pynjot pynpra noh ïa ka Garo Hills Autonomous District Council (GHADC).
U Marak u la kam ba ki jingjynjar ki la dei ka bynta jong ka agenda saiñ pyrthei ban pynduh ïa ki District Council ha Meghalaya.
“Uwei na ki riew saiñ pyrthei ba dei u Garo uba la ih bha u la don ka jingangnud ban pynduh pyndam noh ïa ki District Council ha Meghalaya, bad ki jingeh ha GHADC ka dei ka jingmih na ka agenda ka saiñ pyrthei, ha kaba ki la don katto katne ngut ki MDC kiba don ha ka liang synshar ha Garo Hills ki la wad ka lad ka lynti ban pynduh pyndam noh ïa ka Garo Hills Autonomous District Council. Ki juh ki jingsngew ba la pynpaw da ki katto katne ki MDC kiba don ha ka liang synshar ha ki nongtrei bad wat sha ki para MDC ha kaba ki kdew shai ba ka GHADC kan sa shah khang tala noh,” ïa kane u la ong ha ka kyrwoh khubor ha ka sngi U Blei.
U la kynnoh ba ka jingbym siew ïa ka tulop ki nongtrei mynta la 42 bnai ka la dei ka jingpyrshang kaba la thmu ban pyni ba ha GHADC ka la jur ka bamsap bad ka jingdap ram da kaba la kup da ka dur jong ka Agenda saiñ pyrthei.
“Ka jingbym lah ban siew ïa ki tulop ka la ktah shibun shah ïa ka jingim jong ki hajar ngut, kynthup ruh ïa ki longïing jong kito ki MDC kiba don ha ka liang pyrshah. Watla ki la don bun ki kam ba la wanrah bad ba la pynpaw ïa ki jingsngewkhia shaphang ka jingpyndonkam bakla ïa ka pisa, ka jingduh ka khajna, bad ka jingpynphai ïa ki tnat kiba pynmih pisa sha ka jylla, hynrei na ka liang ki Executive Member kim lah satia ban ïakren pynbeit ïa kine ki mat wat hapdeng ki jingmaham ba la bun tylli,” bynrap u Marak.
U MDC ka BJP shuh shuh u la kynnoh ba wat hapdeng ka jingïohpdiang ka pisa da ki klur na ka sorkar pdeng bad kumjuh na ka pla kynshew pisa jong ka Council, hynrei kumba 40% na kine ki pisa ki la shu jah, kaba lah ban long na ka daw jong ka jingpyndonkam bakla ïa ka pisa.
Haba kynnoh ba ki MDC kiba don ha ka liang synshar ki dei kiba sarong, kiba hangamei bad ki bym lah kaba la lam sha kane ka jingeh, u Marak u la kyntu ïa ki paidbah ka Garo Hills ba kin shim bad khmih bniah ïa kine ki jinglong jingman, da kaba maham ruh ba ka Council ym tang ba ka la pulom hynrei ka la ïaid ruh sha ka lynti jong ka jingjot jingpra ka GHADC.
“Ka jingbym lah jong ki MDC ba don ha liang synshar ka dei ban pynkyndit bynriew na ka bynta ki nongshong shnong jong ka Garo Hills, naba ka Council ym dei tang ba ka la pulom ne ba ka la sdang ban ïap hynrei ka la ïaid sha ka lynti jong ka jingjot jingpra,” u la bynrap.
