Bym hun ïa ka jingpyntreikam ïa ka Saubhagya Scheme

Nongpoh, Jylliew 24: Na ka daw ka jingbym hun halor ka jingpyntreikam ïa ka skhim Saubhagya ha Ri Bhoi ba ka seng ka kwah ba lyngba katei ka skhim ka dei ban ai jingmyntoi ïa ki paidbah nongshong shnong ka Ri Bhoi kiba ym pat ioh ban tan bording kumba la mang da ka sorkar, ka Ri Bhoi Youth Federation (RBYF) ka la shim da ka sienjam ban wad jingtip lyngba ka RTI Act 2005 na ka bynta ban ioh jingtip halor ka jingpynteikam ïa ka skhim Saugbhagya ha Ri Bhoi District.
Kum ban pynpaw paidbah, ka Saubhagra scheme ka dei ka skhim ba pyntreikam da u Myntri rangbah ka ri, u Narendra Modi ha u snem 2017 da ka jingthmu ban pynpoi bording sha man la ki longing ha ki shnong nongkyndong kiba ym pat tan bording bad ban tip halor kane ka jingmyntoi jong kane ka skhim ka seng RBYF ka la wad jingtip lyngba ka RTI khnang ban tip haduh katno kane ka skhim ka la ai jingmyntoi ïa ki paidbah nongkyndong khamtam kito ki longing longsem kiba duk bad kiba ym kot bor ban tan bording.
Ha ka jingïalam u President, u Bah Bipul Thangkhiew ryngkat ka jingsynran lang ki dkhot hynnin ka sngi, ka seng ka la leit ban ati ïa ka Kopi katei ka RTI sha u Deputy Commissioner ka Ri Bhoi ha ka ophis treikam jong u ha Nongpoh.
Kumba la pynpaw ha katei ka RTI, ka RBYF ka la wad jingtip na ka ophis u Deputy Commissioner ka Ri Bhoi naduh ka mang tyngka ba la mang ha kaba pyntreikam ïa kane ka skhim, ki kyrteng jong ki shnong bad ki longing kiba la lah ban tan bording bad kumjuh ruh kito ki longing kiba ym pat lah ban tan bording kumba la mang ha katei ka skhim.
Ka seng ka la wad jingtip ruh ïa ki Contractor lane ki Agency kiba pyntreikam ïa kane ka skhim ha Ri Bhoi bad na ka liang ka seng ka dang ap mynta ïa ka jubab na ka ophis jong u Deputy Commissioner ban ai lut ïa baroh ki jingtip halor kane ka jingpyntreikam ïa kane ka skhim.
Na ka liang u Bah Bipul Thangkhiew. u la pynpaw ba ka seng kan dang buddien halor kane ka jingpyntreikam ïa kane ka skhim bad kan nym ailad ba ka sorkar lane ki Agency kin shu pynsepei ïa kane ka jingmynto ki paidbah bad kumba la mang da ka sorkar lyngba katei ka skhim baroh ki longing ba dei hok ban ioh ban tan boding ki dei ban ioh ïa ka bording kaba pura bad lada ki don ki jingpyndonkam bakla kum ka seng kan nym map bad kan ïaid katkum ki lynti jong ka aiñ.
Ha kawei ka bynta, u la ong ruh ba ka RBYF ka dawa ruh na ka sorkar jylla ba kan pynsted noh ha kaba wan rah ïa ka 132 KV Power Station ha Nongpoh ban pynbiang thikna ïa ka bording ilektrik sha ki paidbah ka Ri Bhoi bad halor kane ka bynta ki la dep ban wan kynduh ïa u Myntri ba dei peit ïa ka bording bad la dep aiti ruh ïa ka dorkhas ba ka sorkar ka dei ban shim khia halor kane ka bynta, kaba dei halor ka nongrim ba ki paidbah ka Ri Bhoi ki shah ktah na ka jingthud palat ka bording ilektrik ha Ri Bhoi.
U la kren ruh ba ka sorkar bad ka tnad MeECL ki la shu ai daw ba ki dang hap ban wad jaka ban buh ai ka 132 KV Power Station bad ha ka jingshisha ka jaka jong ka MeECL ka la don lypa ha Nongpoh ba kim donkam shuh ban dang wad ïa ka jaka bad kum ka seng ka dawa ïa ka sorkar ban shim khia halor kane ka phang bad kan nym myntoi ïa ki paidbah ka Ri Bhoi ba ïa ka bording la lah ban tan haduh 200 MW tang na Ri Bhoi bad katba ki paidbah ka Ri Bhoi pat ki dang mad ïa ka jingshah ktah na ka jinglip palat ka bording ilektrik ba la donkam ban don noh da kata ka 132 KV Power Station, u la bynrap.