Ka EC kan ym leh shilliang ban ïarap ïa ki longïing ba mad lynshop bor mariang: CEM

Shillong, Jylliew 24: U Chief Executive Member (CEM) ka Khasi Hills Autonomous District Council (KHADC), u Bah Shemborlang Rynjah, u la pynthikna ba ka Executive Committee (EC) kan ai ka jingïarap kaba khlem shilliang sha ki paidbah bad ki lanot kiba mad ïa ki jingshah ktah ha ki jingshah lynshop jong ki bor mariang.
Ïa kane u la jubab ïa ka jingkylli ba la wanrah da ka MDC na Nongskhen ka kong Grace Kharpuri hapoh ka Ïingdorbar ha ka sngi baar, na ka liang u Bah Rynjah u la pyntip ruh ba ka EC ka la shim ïa ki sienjam ban ai ki lad jingïarap ïa kito ki longïing kiba shah ktah ha ka jingshah pynjulor ha ki bor jong ka mariang. U la kyntu ruh ïa ki MDC ba kin pyntip sha ka EC shaphang ki shnong ne ki briew kiba mad ha kane ka jingshah ktah ka jingshah pynjulor jong ki bor mariang da kaba ïoh ruh ïa ka kaiphod na ki Rangbah Shnong.
U Bah Rynjah u la banjur ruh ba ka EC kan ai kajuh ka jingïarap ïa baroh kito ki briew bad ki longïing kiba mad ha kane ka jingeh.
“Nga pynthikna ha ka Ïing ba ka EC kan ym leh shilliang ban ai kine ki jingïarap sha kito ki longïing kiba shah ktah ha ki jingshah lynshop ha ki bor ka mariang,” u la ïathuh.