Nongpoh, Jylliew 24: Haba ai jingkren ha ka prokram ïathir ba 2 sngi ba la pynlong ka kynhun wad bñiah jong ka skulbah USTM halor ka phang “Women Leadership and Gender Mainstreaming in Governance of Northeast India”, ka Kong Patricia Mukhim kaba dei ka Editor jong ka kot khubor The Shillong Times ka la ong ba ym don mano mano ba ai bor ïa phi, hynrei phi hap ban pynkup bor ïalade.
Ka la ong ruh ba ki kynthei ha kane ka juk ba mynta ki skhem ka nongrim ban pynpra ïa ki jingeh bad ki jingkhang ban shim ïalade kum ki nongïalam, ryngkat ki sienjam ba kongsan ha ki liang bapher bapher wat hapdeng ka jingkhia bad ka jingeh namar ki kynthei ki kynduh shibun ki jingeh bad ki jingbym ïahap ha kiba bun ki bynta jong ka imlang ka sahlang.
Ha katei ka sngi la wan ruh ban shim bynta da ki khraw pyrkhat, ki nongthoh khubor ba la kham paw, ki nongwad bñiah, ki samla pule na ki jylla bapher bapher ka thaiñ Shatei Lam Mihngi ka ri ban ïakren, ban mir jingmut halor ki bynta, ki jingeh bad ka jinglong nongïalam jong ki kynthei ha ki por ban dang wan.
Haba kren shaphang ka kolshor mahadei jong ki kynthei jong ka thaiñ shatei lammihngi, ka la ong, “Ka long kaba pynsngewtynnad bad ka dei ka jinglong ba shapoh kaba bun ki briew kiba peit na shabar kim ïohi. Lada ki kynthei kim rung sha ka kyrdan kaba shapoh jong ka rukom synshar khadar, kumno ngin khmih lynti ba kin rung sha ka Ïing dorbar thaw aiñ ne ka District Council? Da kaba bynrap bad bishar bñiah ruh ïa ka rukom long ka imlang ka sahlang kaba khanglad ïa ki kynthei ban long nongïalam bad donkam ruh ban kham pynrung ïa ki polisi ban pynsuk ïa ka synshar paidbah bad ban plie lad ruh ïa ki kynthei.
Lyngba katei ka prokram ka la long shisha ka jingmyntoi bad ka jingkyrkhu ïa ki samla pule khamtam ha kane ka juk ba mynta ba kumno ki longkmie bad ki kynthei ki don ka bynta bad ka lad ban long ki nongïalam ha ki bynta bapher bapher ka imlang ka sahlang bad wat ha ka synshar khaddar.
