Nongpoh, Jylliew 22: Ka Joint Joint Action Committee ba la pynïasoh naduh ki 3 tylli ki seng bhalang bad kynthup kumba 9 tylli ki shnong ha ka thain Mawdem-Warmawsaw ki la shim ka rai ban khang lad shi syndon ban ïaid ki kali kit khïah na ka surok na Patharkhmah sha Warmawsaw ha ka thain Western Ri Bhoi halor ka nongrim ba kane ka jingailad ban ïaid ki kali kit khïa ka la pynjot bad pynsiew ïa ka surok paidbah.
Ki shnong kiba la pynïasoh ha kane ka Joint Actioin Committee ki kynthup ïa ka Shnong Mawdem, Warmawsaw, Nongdom Mawplïang, Umsohbar, Umkynsier, Pathardaro, Mawskei Lum bad ka shnong Mawskei Them bad ki lai tylli ki seng bhalang pat ki kynthup ïa ka KSU, FKJGP, bad ka RBYF na Western Ri Bhoi.
Ka daw kaba la pynlong ïa kitei ki seng bhalang bad ki shnong ban thaw da ka Joint Action Committee ka dei halor ka nongrim ba ka jingïaid ki kali kit khïah na katei ka surok ka la pynsniew I akane ka surok bad dei namar kane ka daw ki la thaw lyngba ka Joint Action Committee na ka bynta ban ïa peitngor halor ka leit ka wan ki Kali ba kit khïah bad ban khanglad ban nym ailad ban ïaid ki Kali kit khïa.
Haba pyntip sha ki Nongthoh Khubor, u Bah Centerwell Doloi bad u Bah Receive Pator kiba long ki nongïalam seng na katei ka thaiñ ki la ong ba na ka lïang ka JAC ka la rai ban khanglad shi syndon ban nym ailad ban ïaid ki Kali kit khïah na katei ka surok na Patharkhmah sha Warmawsaw bad lada don kiba ïaleh pyrshah ka JAC kan shim da kawei pat ka lynti na ka bynta ban pyrshah ïa kum kine ki kali kit khïah kiba la pynjot bad pynsiew ïa ka surok paidbah.
Ki la ong ruh kane ka jingïaid ki Kali kit khïah kam shym la pynjot tang ïa ka surok bad hateng hateng ka la pynthud ruh wat ïa ka leit ka wan ki paidbah lyngba katei ka surok kaba dei na ka daw ba ki la kit palat put bad ki ju sahkut ruh ha ki surok
Ki la ïathuh ruh tang na ka daw ka jingïaid ki kali kit khïah lyngba katei ka surok kiba bun jaka ki surok ki la shu sniew bad dap da ki thliew, namar ka jingshna ïa katei ka surok kam shym mut ban ïaid ki kali ba kit tam pud bad ka dei tang ka surok kaba pyndonkam ki paidbah ha kaba la kumno kumno ruh ka jingkhïah ka dei ban don tang hapoh 9 ton.
Ha kawei ka bynta ka JAC ka la dawa ruh na u Contractor ba pyntrei ïa ka surok PMGSY na Phatharkhmah sha Warmawsaw ba un maramot ïa kitei ki surok kiba la sniew bad ha kajuh ka por ruh ki la dawa ba dei ban pyndep noh kham khloi ïa katei ka surok khnang ba kan long ka jingmyntoi na ka bynta ki paidbah ba la leit ba wan bad kiba pyndonkam ïa katei ka surok paidbah, ki la bynrap.
