Nongpoh, Jylliew 22 : Kum kawei na ka jingangnud ban rad diengkhong ïaka jingkynrei jong u Drug hapoh ka Ribhoi District bad kumjuh hapoh ka jylla baroh kawei, ka Ophis trei kam ka District Social Welfare Officer, Ribhoi District Nongpoh mynta ka sngi kala rakhe ïaka ‘International Day Against Drug Abuse and Illicit Trafficking’ na ka bynta ki nongïalam Shnong, Ki Seng Longkmie bad Seng Samla jong ki Shnong bapher bapher jong ka them Ribhoi kaba la pynlong ha Community Hall Iew-Mawlong, Nongpoh.
Lyngba jong kane ka sngii la ioh ban pynshai paidbah halor katei kaphang na ki nongkren bapher bapher ki ba kynthup naduh ka kong E Kharchandy, District Social Welfare Officer, Ribhoi District, Nongpoh, Kong B Pamshong, Psychologist, Civil Hospital Ribhoi District, Nongpoh, Bah Meban Tariang, Counsellor KRIPA Foundation Nongsder, Ribhoi District, S. Pasleiñ, DySP Head Quarter Ribhoi District.
La sakhi lang ruh ha kane ka sngi da ka jingïadon ryngkat lang u Bah DSR Lakiang, Traffic In-Charge, Bah N Wahllang, OC ka Nongpoh Police Station, Rev. David Jamir, Director, Wisdom Rehabilitation Center, Umdihar, Ki Rangbah Shnong bad ki President Secretary jong ki Seng Samla bad Seng Longkmie jong ki Shnong Bapher bapher.
Kitei ki nongkren ha kane ka sngi ki la ban khia bha halor ka jingma jong u drok bad ruh ba ngi dei ban peitngor ïa ka jingrah bor ïa ki kynthei ki khynnah ba kum ki nongïalam bad ki nongshong shnong ki dei ban don lang ka jingkitkhlieh na ka bynta ban teh lakam ïa kine ki kam sniew kiba ktah ïa ki ing ki sem bad ka imlang ka sahlang.
La pynkut ruh ïa kane ka prokram da kaba sam ïaki khusnam sha ki nongjop haka jingïakop Drawing Competition kaba na ka liang ka Ophis Jong Ka District Social Welfare Officer Nongpoh ka la dep ban pynlong ïa katei ka jingïakop ha Christian Higher Secondary School Pahamsyiem ha ki sngi kiba la leit, bad I bawan nyngkong ha katei ka jingïakop I dei i Samla Ïateishwa Nongshli, bawan baar dei i samla Naphibanroi Syngkli, balai Samla Pynshailang Thangkhiew bad I ba wan ba saw dei u samla Wanringam R Marak.
