Da ka folklore music video pyllait ki khun bad aiti sha ki shlem pule ka nongbah

Shillong, Jylliew 22 : Ha ka sngi ba ka pyrthei ka rakhe ïa ka World Music day, ki khun jong i Dr. Hamar Babiang Kharlukhi (bam kwai ha dwar u Blei) ki la pyllait paidbah ïa ka folklore music video kaba la ai kyrteng ‘Ko Lapalang’ kaba une u Doktor u la thoh ïa kane ka jingrwai naduh ki snem 1980 eiei.
Ïa kane ka folklore music video kaba la pynbit pynbiang da u Bah El Dhar bad u Bah Elmer R. War uba dei ruh u khun balai jong une u nongthoh bad ba la rwai ïa ka da ka samla Veeraleen Ameda Khongsit ha ryngkat bad u Bah Herlambok War bad u samla Dawanphrang Langstieh la pyllait paidbah da u MP ka Shillong Parliamentary Constituency, u Dr. Ricky Andrew J Syngkon ha ka jingdonlang u CEM ka KHADC, u Bah Shemborlang Rynjah kum u symbud kongsan.
Ha kane ka sngi la donlang ruh u Bah Lamborne Kharlukhi u MLA barim ka Mylliem bad uba dei ruh u hymmen jong i Dr.H.B. Kharlukhi kum u kongsan kyrpang lem bad kiwei kiwei ki kynrem ki lyndan bad ki nongshah khot sngewbha.
Ha kane ka sngi, la ai sngewbha ruh ïa kane ka Folklore Music Video sha ki katto katne ki shlem pule jong ka nongbah kiba kynthup naduh ka Department of Khasi jong ka skulbah NEHU, ka folklore department, NEHU lem bad ïa ki Kolej, ki skul bad ki museum jong ka nongbah na ka bynta ba kin pyndonkam ha ki jingai jinghikai ïa ki samla pule bad kumjuh ruh ban pynneh pynsah ïa ki khanatang jong ki men barim lem bad ïa ka lariti ka jong ngi.
U Dr. Syngkon haba ai jingkren ha kane ka sngi, u la pynpaw ïa ka jingsngewnguh ïa ki khun jong une u rangbah kiba la shimkhia ban pyndep ïa ki kam kiba sah jong une u rangbah kaba long ka jingmyntoi ïa ka imlang ka sahlang ka jong ngi hi.
Lah ban kdew ba i Dr. Hamar Babiang Kharlukhi i la pynmih ïa bun ki jingthoh kiba ïadei bad ki jinglong jingman jong ka imlang ka sahlang ka jong ngi bad napdeng kita, kiba kham kongsan ki long ka jingthoh ïa ka khana shaphang i Meirad Nabon Sawian iba dei i kynthei khasi ba nyngkong eh ban long kristan ha kane ka ri ka jong ngi bad ïa kane ka khana la shim da ka Jingïaseng Samla KJP Synod Sepngi ban shna noh kum ka phlim kaba la ai kyrteng ‘Nabon : a journey of faith.
Shuh shuh ka jingthoh ka jong i shaphang ka shnong Mawlai la pynmih ruh ha ka dur jong ka documentary film da ka Documentation Committee Mawlai bad kumjuh ruh dang ha u snem ba la dep, ki khun jong i ruh ki la pynmih ïa ka jingrwai ‘Ka jingshad u Laiphew Doh’ kaba la shna ha ka dur jong ka animation.