Nongpoh, Jylliew, 20: Kiba haïing hasem lem bad ka bor shnong ki la pynpaw ïa ka jingsngewkut lad kut lynti ban dang bteng ka jingwad ïa uwei u rnagbah uba la jah, kaba dei na ka daw ba la shiphew sngi mynta ki la ïa pyrshang ban ïa wad bad kim shym la lap dien satia shanoh u la jah.
Une u rangbah ba la jah la tip kyrteng kum u Carlus Tron bad uba shaid khot u Jack hapoh katei ka shnong bad une u rangbah u la jah naduh ka 11 tarik u Jylliew 2025 ha ka shnong Umran bahap ha ka surokbah National Highway-6 ha Ri Bhoi District.
Kumba la ïathuh, une u rangbah u dei na ka shnong Ummar ba hap ha ka thain Ri Bhoi Sepngi, ha kaba la ong ba ha katei ka sngi, u dang wan buh ïa ka kurim ban leit kha khun sha Lawmali Hospital bad ha ka por mynmiet u la wan phai bad la ka kiaw kurim, bad 3 ngut ki paralok kiba la wan shaw ïa u na Lawmali, hynrei hadien ba la poi ha Umran u la phah sangeh ka Kali ban leit shabar bad dei ha katei ka por kaba um wan phai shuh lano lano haduh ba la pynlyngngoh ïa ka Kiaw kurim bad kitei ki Paralok kiba la wan shaw ïa u na Lawmali.
Kumba la pynpaw sha ki lad pathai khubor lyngba u para jong u, u Bah Andreas Trono, la ong ba kum kiba haïing hasem bad wat ka bor shnong ruh ki la kut lad kut lynti ban leit wad ïa utei u rangbah ba la jah, namar mynta la dap 10 sngi lynter ba u la jah kim shym la lap ksai satia shano u la jah bad shano u la poi.
U la ong ruh na ka liang ka ïing ka sem ki la dep ruh ban ujor da ka ejehar sha ki Pulit ka Umsning Police Station ha katei ka sngi kaba u la jah bad kumba long haduh mynta kim pat shym la ïoh kano kano ka khubor na ki pulit kumno ki la leh ïa kane ka kam.
Kum ka ïing ka sem bad ka shnong hi baroh kawei, ki dap da ka jingsngewkhia ba kim shym la lap shuh ïa utei u rangbah ba la jah bad ha kawei ka bynta ki la kyrpad ïa ki bor pulit bad ki paidbah ba kin sngewbha ban pyntip lem lada ki lap ne ïohi ïa une u rangbah uba la jah mynta la shiphew sngi lynter khlem da lap dien satia, u la bynrap.
