Yn mihkhmat ka skul Nongjri Presbyterian SSbad ka Mawtneng SS sha ka State Level Subroto Cup na Ri Bhoi District

Nongpoh, Jylliew 17: Ka lympung District Level Inter School Subroto Cup Football Tournament bala pynlong da ka ophis u District Sports Officer ka Ri-Bhoi District kala poi noh sha kaba kut hadien ka jingïakhun phainal ban knieh ïaka nam lahduh hapdeng 6 tylli ki skul na ka them Ri-Bhoi ha madan ïalehkai ka shnong Umdihar.
Ïa katei ka lympung la wan ban pynhap pyrda noh mynta ka sngi da u bah K Passah Director ka Directorate of Sports and Youth Affairs kum u kongsan bad u Bah RB Shadap President ka RBDSA kum u symbud kongsan ryngkat ka jingsakhi lang u MLA ka Mawhati u Bah Charles Marngar bad kiwei kiwei ki riew rangbah bad ki ophisar naka tnad ïalehkai.
Haba phai sha ka jingïakhun phainal ha katei ka sngi haka kyrdan U-17 jong ki kynthei ka Nongjri Presbyterian Secondary School kala lah ban pynliem noh ïaka Christian Higher Secondary School da 1-0 kol.
Ha ka kyrdan U-15 ki shynrang ka Mawtneng UP & Secondary School ka la pynliem noh ïa ka Mynken Christian Hr. Secondary School da 1-0 kol.
Katba haka kyrdan U-17 ki shynrang kaba dei ruh ka jingïakhun kaba ïakhaid bad shongshit ka Nongjri Presbyterian Secondary School kala lah ban pynliem noh ïaka Nehru Memorial Higher Secondary School da 17-16 kol lyngba ka jingshut tie breaker hadien ka jingïakhaid da 1-1 kol haka jingïakhun.
Naka liang ka ophis u DSO kala sam ruh ïaki khusnam ha katei ka sngi sha ki nongjop bad kumjuh ruh kiba rem ryngkat ki khusnam shimet bad pyntip ruh ba kitei ki skul kiba la ioh rah ïaka nam lahduh kin ioh ban mihkhmat ïaka District sha ka State Level Inter School Subroto Cup ka ban sa long shen ha Nongbah Shillong.