Nongpoh, Jylliew 16: La san sngi lynter mynta uwei u rangbah briew na ka shnong Ummar ba hap ha ka thaiñ Western Ri Bhoi u la jah rngai khlem wan phai ïing shuh bad kane ka la pynsah ïa kiba haïing hasem bad ïa ka Shnong ka thaw hapdeng ka umdum ba kim lah ban tip shaei u leit ne u la jah.
Une u rangbah ba la jah la tip kyrteng kum u Carlus Tron ba ki ju khot ieid ruh ha shnong da u Jack bad kumba la ïathuh da kiba haïing, la ong ba une u rangbah u la jah naduh ka 11 tarik mynta u bnai hadien ba u la wan buh ïa ka Lok ba dang armet ban leit kha khun sha Ganesh Das Hospital Shillong.
La ïathuh ruh na ka daw ba um ioh kali shuh ban wan phai sha la ïing na Ganesh Das Hospital, une u rangbah u la phone ïa u Bah Youngmind Makri u ba dei u Secretary Shnong ka Ummar ban phah wanshaw bad na ka daw ba ba une u Secretary Shnong um lait ba leit shaw dalade u la phah leit da ki paralok ban leit shaw bad ki la wan phai ryngkat bad ka kiaw kurim jong u.
Ha kane ka jingwan phai na katei ka Hospital, kaba la pynlyngngoh ka long hadien ba la poi ha Umran, une u rangbah u la phah sangeh ïa ka Kali harud ka surok kumba ha ka por 8 duna ei ei da kaba ong ba u kwah leit shabar, hynrei une u rangbah u la shuh jah noh khlem wan phai sha ka Kali kaba la pynlyngngoh ïa ka kiaw kurim jong u bad ïa kitei ki paralok ba wan shaw ïa u.
La ong ruh na ka daw ba um wan phai shuh sha ka Kali, ki la pyrshang ban leit wad ïa u sha katei ka jaka leit shabar bad ki khlem lap dien satia ha kaba ki la pyntip noh sha ki Pulit ka Umsning Police Station halor kane ka jingjia bad ujor ruh da ka ejahar.
La ïathuh ruh halor kane ka jingjia, na ka liang ka Shnong Ummar bad ki paidbah naduh katei ka sngi ki la mih paidbah ban leit wad ïa une u rangbah uba la jah ha katei ka jaka, hynrei haduh mynta kim shym la lap satia, ha kaba ki la buh ruh ka jingkyrpad ïa ki paidbah ba iohi ba kin pyntip lem sha ka Shnong ne sha ki bor pulit.
Shuh shuh, halor kane ka jingjah une u rangbah, ka shnong bad ki paidbah ki la leit wad biang ïa u ha katei ka jaka bad leit ruh ban buddien biang naki pulit ban pynsted ka jingtohkit ban lapdien ïa utei u rangbah.
