Giriraj Singh, Union Minister ba khmih ïa ka Textiles
Ha ki katto katne snem ba la dep, ïa ki technical textile la peit kum ka bynta ba shabar, kaba duna ha ka jingtreikam, kaba duna ka jingbei tyngka bad kaba shaniah shibun ha ki mar kiba wan nabar ri. Mynta, ki ïeng hapdeng jong ka jingkylla ha ka kam karkhana jong ka India. Kane ka jingkylla kam dei kaba shujia ryngkhat. Ka dei ka jingmih na ka buit treikam kaba la thmu bha, ka jingïohi jngai ïa ki polisi bad ka jingaiti ha ka ri, kaba la pynskhem ha ka jingthmu kaba kham ïar jong ka Atmanirbhar Bharat hapoh ka jingïalam ba shlur jong u Myntri Rangbahduh ba donburom u Narendra Modi. La ka long ban pynkiew ïa ka jingpynmih PPE ha ka por jong ka jingeh COVID-19, ban kyrshan ïa ki shipai da ki tiar ai jingïada ba shna hapoh ka ri, lane ban pynbiang ïa ki tiar ba kongsan na ka bynta ki kam kum ka Sindoor, ki technical textile ki la pyni ïa ka bynta jong ki kum ki nongplie lad ïa ka jingpynkhreh jong ka ri bad ka jingkiew ha ka kam karkhana.
Na ka bynta ba kyrpang sha ka bynta ba kongsan: Ka jingdonkam jong ka polisi
Ka por kaba kongsan ka la wan ha ka por jong ka jingïalang bishar bniah jong ka National Technical Textiles Mission (NTTM), ha kaba nga la ïoh lad ban ïakren bad u Chairman jong ka ISRO ha kato ka por, u Dr S. Somanath. U la pynpaw ïa ka jingdonkam kaba nangroi na ka bynta ki jaiñ ki ksai ba kyrpang kum ki carbon fibre, ki UHMWPE (Ultra-High Molecular Weight Polyethylene) bad ka nylon 66-ki tiar kiba donkam na ka bynta ki jingpyndonkam ha ka kam liengsuiñ. Ka khubor jong u ka long kaba khlem jingartatien: Ka India ka dei ban tei ïa ki bor jong ka ri ri ha kine ki bynta, ym tang ban pynduna ïa ka jingshaniah, hynrei ban plie lad ïa ka kyrdan kaba bud jong ka jingkiew ha ka jingstad saïan jong ngi. Kata ka jingïakren ka la pynskhem biang ïa ka jingdonkam ba kongsan jong ki technical textile ha ka jingïathuh khana shaphang ka jingkiew ka India, naduh ki jaka test haduh ki jaka plie lad.
Naduh ka Lab haduh ki jaka plie lad bad ki jaka ïakhun
Ka Tnad ïada ri ruh ka la sdang ban sngew ïa ka dor ba kongsan jong kane ka jingkylla. Kum ban shu kdew ïa ka nuksa Operation Sindoor, kaba la pynlong dang shen da ki shipai jong ngi, ha kaba ki tiar kiba ïadei bad ki kam pynbthei bad ki jait jaiñ ban buhrieh ïa ki shipai bad ki jaiñ ïada na ki jait dawai bapher bapher, ki technical textile ki la don ka bynta kaba kongsan bha. Kumba ngi la sdang ban bei tyngka kloi ha ka jingkyntiew ïa ka bor treikam hapoh ka ri, mynta ngi lah ban kyrshan ïa ka Tnad Iada ri jong ngi ym tang da ka bor briew, hynrei da ki tiar kiba ïadei bad ki jinglong jong ka pyrthei, kiba la ïew bad shna hapoh ri India.
Ka jingsngewthuh ïa ki Technical Textiles
Ki Technical Textile kim dei shaphang ka riam ka beit ne ka jingitynnad. Ki dei ki tiar kiba treikam bha kiba la saiñdur ban shakri ïa kano kano ka kam, bunsien ha ka jingïada ïa ka jingim lane ki jingdon jingem kiba kongsan. Kine ki kynthup ïa ki jaket kiba lah ban ïada na ki kuli, ki uniform kiba lah ban ïada na ka ding, ki jaiñ ba pyndonkam haba puid nongpang, ki jaiñ kiba lah ban ïada na ki khniang jingpang na ka bynta ki nongrep, ki geo-grid kiba pynskhem ïa ki surok bad kiwei kiwei. Kane ka bynta ka kynthup ïa 12 tylli ki bynta ba kongsan ba kynthup ïa ka Geotech, Meditech, Protech, Agrotech bad Buildtech. Haduh u snem 2024, ka ïew technical textile jong ka ri India ka shongdor haduh USD 26 billion. Ngi don ha ka lynti ban kot sha ka USD 40-45 billion shuwa u snem 2030, da kaba kiew bha man la u snem kaba long 10-12%. Lada ïanujor bad ka jingkheiñ kyllum jong ka pyrthei ha kaba ki technical textile ki long 27% na ka jingmih baroh jong ki jaiñ, ka India ka ïeng ha ka 11%. Hynrei da ka jingkyntiew kaba dei, ngi nangsted ban ïaryntih kyrdan bad kiwei kiwei ha kine ki kam.
Ka Jingpynlong ïa ka Jingroi: Ki jingïarap ba kongsan jong ka Sorkar
Ban plie ïa ki lad kiba don ha kane ka kam, ka Sorkar India ka la kular ban pynlut haduh T.12,000 klur lyngba ar tylli ki sienjam ba kongsan – ka National Technical Textiles Mission (NTTM) bad ka Production Linked Incentive (PLI) Scheme na ka bynta ki jaiñ. Kine ki prokram kim treikam marwei. Ryngkat, ki pynkylla ïa ka India sha ka jaka pdeng jong ka pyrthei na ka bynta ki Technical Textile. Hapoh ka NTTM, ngi wanrah ïa ka jingbei tyngka ha ka jingwad bniah bad ka jingsaiñdur thymmai. La mynjur haduh 168 tylli ki projek kiba don jingktah bha da ka jingkyrshan jong ka sorkar kaba long T. 510 klur. Bun na kine, kum ka jingshna ïa ki jaiñ ba pyndonkam haba rung ha ki jaka ba pluh ding bad ka rukom thaiñ jaiñ na ka bynta ki geo-textile, ki la dep ban ïaid na ka lab sha ka ïew ka hat.
NTTM: Ka jingsaiñdur thymmai ha ka jingpynbiang bai seng kam, ka jingpyntbit ïa ka ri India
Da kaba ïoh jingïalam na ka Atmanir bharta, ka National Technical Textiles Mission ka buh ïa ki nongrim kiba skhem na ka bynta ka jingsaiñdur thymmai bad ka jingkyntiew ïa ki sap. Katba 17 tylli ki startup ki la ïoh jingkyrshan hapoh ka skhim GREAT (Grant for Research & Entrepreneurship across Aspiring Innovators in Technical Textiles). Palat 2,000 ngut ki samla pule ki dang pule ïa ki jinghikai shaphang ki technical textile ha 41 tylli ki jaka pule ba pawnam, ba la kyrshan da 16 tylli ki jinghikai kiba ïadei bad ka karkhana kiba pynwandur ïa ka bor treikam kaba la pynkhreh na ka bynta ka lawei.
Ka jingwanrah ïa ka jingdawa, ka jingpynpoi kam sha kylleng ka pyrthei
Da ka jingkyntiew ïa ka ïew ka hat kum ka nongrim ba kongsan, ka NTTM ka nang pynïar ïa baroh ar ka jingpdiang hapoh ka ri bad ka jingpoi sha ka pyrthei. Ka jingpyndonkam ba donkam ïa ki 73 tylli ki tiar technical textile ha kylleng ki bynta kum ka koit ka khiah, ka rep ka riang, ki jingdon jingem, bad ka jingïada ka la pynlong ïa ki ban pynïasoh lang ha ki jingdon jingem paidbah. Palat 30 tylli ki prokram kylleng ka pyrthei, kynthup ïa ka Bharat Tex 2025, ki la pynkhraw ïa ka jingïohi jong ka India. Ha kajuh ka por, ka jingshalan ïa ki jaiñ ba la shna da ki briew ka la kiew na ka USD 4.2 billion ha u snem 2020-21 sha ka USD 5.3 billion ha u snem 2024-25, bad ka jingpynduna ïa ka jingwanrah nabar ri ka pyni ïa ka jingkiew jong ka jinglah kyrshan dalade bad ka jinglah ban ïakhun.
Ka jingpynïasoh ïa ka jingtreikam bad ka polisi: Ka rukom treikam jong ka PLI
Ha ki kam shimet, la ai khusnam ïa ka jingtreikam. Kito kiba tam ïa ka thong ki ïoh jingmyntoi ban ïaid shakhmat bad ban kyntiew ïa ka jinglong ka ïoh kam ïoh jam jong ka ri. Kata kajuh ka nongrim mynta ka pyntip ïa ka polisi karkhana jong ngi lyngba ka Skhim Production Linked Incentive (PLI). Kane ka skhim ka pyni ïa ka jingkylla ha ka rukom treikam ha kaba ki jingai jingmyntoi kim dei shuh ki jingai jingïarap, hynrei ki jingai khusnam kiba ïadei bad ka jingtreikam. Ka ithuh ba khnang ba ka India kan lah ban ïakhun ha ka pyrthei, ïa ka kam shna tiar dei ban shim kum ka thong, da ki jingthew kiba shai, ka jinglah ban pynïaid ïew bad ka jingmut jingpyrkhat kaba thmu ban kiew shaphrang.
Ryngkat, ka NTTM bad ka PLI ki ai ïa ka kor kaba ar: katba ka NTTM ka buh ïa ka nongrim lyngba ka jingwad bniah, ka jinghikai bad ka jingkyntiew ïa ka sap, ka Skhim PLI ka pynsted ïa ka jingroi. Na ki 80 tylli ki kompeni ba la jied hapoh kane ka skhim, palat shiteng (thikna 56.75%) ki trei ha ka kam technical textile. Kane ka dei ka dak kaba khlaiñ jong ka jingshaniah ha ka karkhana. Da kane ka jingkyrshan, ngi la ïohi ïa ki jingbei tyngka ba thymmai kiba kot sha ka T.7,343 klur, kaba la pynlong ïa ka jingïohnong kaba phylla kaba long T. 4,648 klur bad ka jingshalan shabar ri kaba long T.538 klur. Ban pynthikna ïa ka jingpyntreikam kaba ïaid beit ïaid ryntih, ka Tnad Textiles ka la shim ïa ki sienjam. Ngi la pynmih ïa ki code HSN na ka bynta ki technical textiles ha ki lai tylli ki khep – u bnai Jylliew 2023, u bnai Risaw 2024 bad u bnai Rymphang 2025 bad ngi la pyllait ruh ïa ki jingkylli ba bniah ban pynshai ïa ki riti dustur bad ka jingbud ryntih. Ka jingpynkylla kaba kongsan ha u bnai Rymphang 2025 ka la ïarap ban ai jingkyrshan kloi haduh T. 54 klur.
Ki jingangnud jong ngi ki ïaid shabar palat ïa ki pud ki sam jong ka ri. Lyngba ka skhim PLI, ka India ka dang pynroi stet ïa ka bor ha ki mar kiba rem dor kum ki tiar kiba wanrah jingshngaiñ ha kaba ïadei bad ki kali, glass fibre bad ki carbon fibre. Kine ki tiar ki don ka bynta kaba kongsan ha ki kam kum ka jingpynher liengsuiñ, ka kam ïada ri, ka bording kaba khuid bad ka koit ka khiah. Da kaba kyntiew ïa ka jingshna tiar hapoh ka ri ha kine ki bynta, kane ka skhim ka buh ïa ka India ha ka kyrdan kaba biang ban ïakhun bad ki nongshalan jaiñ kiba pawnam ha ka pyrthei kum ka China, Vietnam bad Bangladesh.
Ka jingktah haduh mynta
Ka jingktah jong ki sienjam ba ïatylli jong ngi ka la paw lypa. Ka ïew hapoh ka ri India na ka bynta ki technical textiles ka kiew ha ka dor kaba 10% man la u snem. Ka jingshalan shabar ri ha u snem mang tyngka 2024-25 ka long USD 2.9 billion. Haduh u bnai Lber 2025, ngi la khring ïa ki jingbei tyngka kiba shongdor T.5,218 klur bad pynmih ki lad ïoh kam ïa palat 8,500 ngut ki briew. Tang ki Technical Textile ki la pynlong ka jingïohnong kaba T.3,242 klur, kynthup ïa ka jingshalan shabar ri kaba shongdor T.217 klur. Kane ka data kam dei tang ki nombar, ka dei ka jingpynshisha ba ka buit jong ngi ka treikam.
Sha ka lawei kaba lah ban neh bad kaba lah ban kyrshan dalade
Ka jingpynneh pynsah bad ka jinglong kyllum ka long ka tynrai jong ka buit technical textiles jong ka India. Ki jaiñ bad ki ksai kum u sai byrni, hemp, ramie, cotton silk bad wat u milkweed ruh la pyrkhat biang na ka bynta ki jingpyndonkam kiba ai jingmyntoi ïa ka mariang katba ki pynkupbor ïa ki nongrep bad ki karkhana jong ngi. Ki jingpynbeit ba la pynshong nongrim ha ka Mariang (NbS) ki dang mih kum ki jingïarap kiba khlaiñ bor kiba pynïasoh lang ïa ka jingsaiñdur bad ki jaiñ bad ki ksai tynrai. Kum ka nuksa, ki jaboh na ki Pashmina Kashmir mynta la pyndonkam ha kaba shna ïa ki jingtap; la pyndonkam ïa u cotton bad silk ha ki jingpynkhuid ïa ki jingmynsaw bad ha ka tissue engineering; bad ka jingpyndonkam ïa ka silk ha ka 3D printing. U sai byrni u iarap ïa ki biodegradable medical implant, ki mar kiba sting na ka bynta ki kali, ki tiar shna kiba ïadei bad ka mariang, bad ki tiar kiba neh slem. Ha kajuh ka por, ngi buh hakhmat eh ïa ka jingshna mashin hapoh ka ri, bad 25 tylli ki projek ki dang ïaid shakhmat ban pynmih ïa ki mar kiba shongdor T.68,000 klur-ba la khmih lynti ba kin noh synñiang T. 6,700 klur ha ka jingshalan mar shabar ri-kaba plie lad ïa ka lawei karkhana kaba lah ban kyrshan dalade bad kaba ïaineh.
Kum u Myntri Sorkar Pdeng ba dei khmih ïa ka Tnad Textiles, nga sngew sarong ban ong ba ka India kam dei tang kaba ïashim bynta ha ka jingïakhih jong ki technical textile ha ka pyrthei-ngi buh ïalade ha ka kyrdan ban ïalam ïa ka. Da ka bor ba ïatylli jong ka NTTM bad ka PLI, ngi kyntiew ïa ka jingsaiñdur thymmai, ngi pynmih ïa ki lad ïoh kam, ngi pynkhlaiñ ïa ka jingshalan mar shabar ri, bad ngi tei ïa ka bor ïaineh jong ka ri. Naduh ka jingkyrshan ïa ka kam ïada ri bad ka rep ka riang jong ngi haduh ka jingpynthymmai ïa ki jingdon jingem bad kiwei kiwei, ki technical textile ki pynwandur ïa ka jinglong thymmai kaba shlur ha kaba idei bad ki kam karkhanana ka bynta ka ri India. Bad kane ka long tang ka jingsdang.