Nongpoh, Jylliew 13: Ka Meghalaya State Pollution Control Board katkum ka jingpynkup bor lyngba ka “The water (Prevention and Control of Pollution) act 1974 bad ka Air (Prevention and Control of Pollution) Act 1981” ka la mana ïa baroh ki karkhana bad kumjuh ruh ki paidbah ban nym pynmih lyer jaboh ha ki jaka dang ïakhun ban pynduna katkum ki kyndon bala buh da ka MSPCB.La pyntip ruh ba kino kino kiba pynkheiñ bad ki bym bud ïa ki kyndon 21 ne 22 lane ka jingbthah katkum ka kyndon 31(a) kin shah pynshitom ryngkat ka set along.
Ka MSPCB ka la mana ruh ïa ki nongpynmih jaboh ba kim dei ban bret pathar ïa ki jaboh ba long eh ha ki surok bah, ki jaka paidbah, ki nala bad ki wah duid.Shuh shuh la bthah ruh ïa baroh ki nongpynkhuid surok ba kim dei ban thang ïa ki sla dieng ba la lum na ka jingpynkhuid surok bad ban buh kyrpang ïa ki bad ban aiti sha ki nongpynkhuid jaboh ne ki agency ba la ai bor da ki bor shnong.Ïa kane ka hukum bad ka jingmaham la pynmih ruh dei hadien ka jingleit jurip ïa ki jaka ba don ki karkhana ha ka thaiñ Umiam bad Byrnihat da ki ophisar jong ka tnad MSPCB ha kaba ki la don buh ki jingpynmih jaboh bad ka jingthang beaiñ ïa ki jaboh jabaiñ kaba la wanrah ka jingjur ka lyer jaboh.
